77
Eeri akubbembera abembi. EZabbuli yʼAsafu.
OKibbumba niiye omununuli
1 Neekungiriire oKibbumba okumbeera;
neekungiriire oKibbumba, nga mmusaba ampulire.
2 Owenabbaire nga ndi omu kabbikabbi, nanoonerye oMusengwa.
Nasiirirye engalo gyange engulu nga nsaba obwire bwonabwona amantademba,
neye omwoyo gwange gwagaine okwiramu amaani.
3 Owenseega oku Kibbumba neeraliikirira.
Owemmufumintirizaku, amaani gampwamu.
4 Tanganya okugona,
neeraliikirira ino nandi ni mpezya okutumula.
5 Nseega oku biseera ebyʼeira,
ni neebukirya emyanka egyʼeira.
6 Nseega ekiire kyonakyona,
ni nfumintiriza nga weneebuulya omu mwoyo nti:
7 “OMusengwa yatulekesulira nakimo?
Era tiyaliirayo okutusiima?
8 Tiyaliirayo okutukwatira ekisa emirembe gyonagyona?
Nʼebiyasuubizire bikomere aawo?
9 OKibbumba yeerabiire okubba owʼekisa?
Obusungubwe bwigaliriirye okusaasira?”
10 Era nakobere nti, “Ekinnuma eino niikyo kinu,
oKibbumba oNambulaku aMwagaagana takaali alaga amaanige!”
11 Nayebukiryanga ebikole bya Musengwa,
dala nayebukiryanga ebyamagero ebiwakolanga eira.
12 Nafumintirizanga oku byokola byonabyona,
era ni nseega oku byewunyo ebyokola byonabyona.
13 Oo Kibbumba, ebyokola byonabyona bitukulye,
kibbumbaki owʼamaani ooti Kibbumba waiswe?
14 Niiwe oKibbumba akola ebyamagero,
olaga amaanigo omu mawanga.
15 Wanunwire abantubo nʼengaloyo eyʼamaani,
wanunwire abʼeibyaire lya Yaakobbo nʼoYusufu.
16 Oo Kibbumba, amaizi
owegakuboine gatiire,
olwabi lwʼenyanza ni lutengeeta.
17 Ebireri ni bisusuca amaizi oku kyalo,
eigulu ni libbwatuka,
okumesya ni kuwoisya wonawona!
18 Eigono lyʼokubbwatukakwo, ni liwulikikanira omu gumpunga ogwʼamaani;
okumesya ni kumoleka ekyalo kyonakyona.
Ekyalo ni kitya era ni kitengeeta!
19 Wateekerewo enzira omu nyanza,
era ekimaira omu maizi amangi.
Neye awantu ebigere awebyemere tiwabonekere.
20 Wekubbembeire abantubo ooti-so weekubbembera ntaamagyo,
ngʼoMusa nʼAlooni babalabirira.