78
EZabbuli yʼAsafu.
OKibbumba mwesigwa
1 Oo inywe bantu bange muwulire ebinjegesya.
Mutege amatwi eeri ebibono ebintumula.
2 Nalitumula nga nkolesya ngero,
nalibbutula ebimbaire nkaali okubiikula ebyʼeira nʼeira,
3 ebitwawuliire era ni tubimanya,
abazeiza baiswe ebibatukobeire.
4 Titwalibibisa abaana
abʼomulembe ogwaliirawo.
Twalibakobera obwezye bwa Musengwa
nʼebiyakolere ebikulu, aamo nʼebyewunyobye.
5 Yawaire abaizukulu ba Yaakobbo ebiragiro,
nʼateeka amateeka oMwisirairi.
Yalagiire abazeiza baiswe
bageegesyenge abaana baabwe.
6 Abʼomulembe ogwaliirawo olwo kaisi bagamanyenge,
nʼabaana bona abebakaali kubyala
era bona bagamanyikisye abaana baabwe.
7 Omu ngeri eyo bateekenge eisuubi lyabwe mu Kibbumba.
Era nandi ni beerabira oKibbumba ebyakola,
neye ni bakwatanga amateekage.
8 Tibaabbanga ooti bazeiza baabwe
abʼomulembe omukakanyali era omujeemu.
Emyoyo gyabwe tigyagondeire oKibbumba,
era nga tibeesigwa egyali.
9 Abantu bʼEfulaimu babbaire bakwaite obulaso,
neye bairire e nyuma oku lunaku olwʼolutalo.
10 Tibakuumire endagaano yaabwe nʼoKibbumba,
era bagaine okugondera amateekage.
11 Beerabiire ebintu ebiyabbaire akolere,
nʼebyewunyo ebiyabbaire abalagire.
12 Yakolere ebyewunyo omumaiso gʼabazeiza baabwe
nga bali omu kyalo kyʼe Misiri, omu kitundu kyʼe Zowani.
13 Yayawiiremu enyanza, nʼababityamu aakati.
Yayemereirye amaizi, ni gakola ontuumo.
14 Omusana yabeekubbemberanga nʼekireri,
kaisi obwire bwonabwona nʼekikondo kyʼomusyo.
15 Yaatire amabbaale omwidungu,
nʼabawa amaizi mangi ooti-so gazwa mu lwabi.
16 Yatemwire ensulo omwibbaale,
nʼakulumuca amaizi ooti miiga.
17 Neye era ni beeyongera okukola ebikole ebibbibibbi omumaisoge,
nga bali omwidungu ni bajeemera oyo oNambulaku aMwagaagana.
18 Ni bakema oKibbumba mu kugenderera,
nga bamusaba ebyokulya ebibayoya.
19 Ni batala oKibbumba, nga bakoba bati,
“OKibbumba tayezya okutugabirira ebyokulya omwidungu.
20 Dala yakubbire eibbaale, amaizi ni gatiiriika okuzwamu,
ni gakola emyala egyʼamaani ni gikulumuka.
Neye ayezya okutuwa ekyokulya kyona?
Ayezya okugabirira abantube enyama?”
21 OMusengwa oweyabawuliire, nʼasunguwala ino,
obusungubwe ni bwika oku Yaakobbo,
obulwabwe ni busetukira okwIsirairi.
22 Ekyo kityo olwʼokubba tibaikiririirye omu Kibbumba,
ooba okwesiga obwezyebwe obununula!
23 Neye era nʼalagira ebireri angulu,
era nʼaigulawo emiryango gyʼeigulu
24 nʼamagalica emaanu abantu okulya
nʼabawa ekyokulya okuzwa omwigulu balye.
25 Abantu ni balya
ekyokulya ekyʼabamalaika,
oKibbumba nʼabawa ekyokulya ekibitiriri.
26 Yasetwire ompunga omwigulu nʼafuwa okuzwa e buzwaisana,
era olwʼamaanige nʼasindika ompunga okuzwa e maserengeta.
27 Yabamagaliciirye enyama ooti nsenye,
enyonyi ni gibba nyingi ooti musenye oguli oku mbale kwʼenyanza.
28 Yagireetere ni gigwa aakati omu nkambi,
okweruguulirirya eweema gyabwe.
29 Kale abantu baliire era ni baikuta,
olwʼokubba yabawaire ekibabbaire beegomba.
30 Neye nga bakaali balya ekibatakire,
nʼekyokulya nago nga kikaali kiri omu minywa gyabwe,
31 obusungu bwa Kibbumba ni bubasetukiraku.
Nʼaitamu abo abakira amaani,
era oIsirairi nʼafiirwa abanyeete.
32 Waire ebyo byonabyona nga bityo, era basigaire nga bakola ebikole ebibbibibbi.
Waire yakolere ebyewunyo, nandi ni bamwikiririiryamu.
33 Kale nʼakomya obwomi bwabwe ooti mwota ogubayeera,
nʼamalawo obwomi bwabwe mu kirulumo kyʼekibbwatukira.
34 Nabuli oluyabaitangamu, awo ni bamunoonia,
ni bacuuka ni baira eeri oKibbumba.
35 Beebukiirye bati oKibbumba niiye eibbaale lyabwe omu beebisa,
era bati oKibbumba oNambulaku aMwagaagana niiye omununuli waabwe.
36 Neye era babbutwire nʼeminwa gyabwe kumukiina.
Era ni batumula ebibono kumubbeya.
37 Tibabbaire beesigwa egyali,
tibakuumire endagaanoye.
38 Neye oKibbumba olwʼokubba iye wʼekisa,
nʼabasoniya ebibbibibbi.
Era tiyabajigiricirye.
Emirundi nʼemirundi nʼafuganga obusungubwe,
era nandi nʼabasetuliraku obulwabwe bwonabwona.
39 Ekyo kityo olwʼokubba yayebukiirye ati ibo bantu abafa,
era abali ooti mpunga afuwa nʼagotawo.
40 Emirundi mingi egibamujeemeire omwidungu,
era ni bamusunguwalirya omwidungu.
41 Emirundi nʼemirundi ni bakema oKibbumba,
ni basunguwalya oMutukulye wa Isirairi.
42 Tibayebukiiryeku obwezyebwe,
nʼolunaku oluyabanunuliireku eeri omulabe,
43 oweyalagire obumanyiciryo wʼebyewunyobye omu kyalo kyʼe Misiri,
nʼebyamagero omu kitundu kyʼe Zowani.
44 Emiiga yagisuucirye musaaye,
nga tibayezya okunywa oku myala gyagyo.
45 Yabasindikiremu ebiziima byʼenzi egyabagadirye,
nʼebikere ebyababitirye obundi.
46 Nʼebirime byabwe nʼabiwa amagino okubirya,
nʼenzige okujigirica emisiri gyabwe.
47 Yajigiricirye emizabbibbu gyabwe ngʼakolesya amabbaale ga ikendi,
nʼemitiini ngʼakolesya amataba.
48 Ente gyabwe gyona yagiitire nʼamabbaale ga ikendi,
entaama gyabwe eraadu nʼegikubba.
49 Yabasukireku entiisya yʼobusungubwe,
nʼobulwa, nʼekiruyi, nʼabateekaku nʼendibo,
nga biri ooti bamalaika abajigirica.
50 Yasalirewo okutafuga obusungubwe,
waire okuteterya obwomi bwabwe,
wazira nʼabasindikira okawumpuli okubaita.
51 Yaitire abaana bonabona ababere abʼomu Misiri,
ibo abaana bʼomu mavuvuka omu kyalo kyʼe Misiri.
52 Olwo nʼakubbembera abantube ooti muliisya owaakubbembera entaamagye,
nʼabalungamya okubabitya omwidungu.
53 Yabakubbembeire kusani nga babula okutya.
Neye enyanza nʼebbuunaku abalabe baabwe.
54 Nʼatuuca abantube omu kyalokye ekirongoole,
omu kyalo kyʼensozi iye onanyere ekiyawambire.
55 Nʼabbingamu abanamawanga ngʼabantube bakituukiremu,
nʼakibagabulyagiramu ngʼobusika.
Era ebisito byabwe nʼabikwatisya ebika bya Isirairi.
56 Neye era ni bagezesya oKibbumba
era ni bajeemera oyo oNambulaku aMwagaagana.
Tibakwaite ebiragirobye.
57 Nga tibagonda era nga tibeesigwa ooti bazeiza baabwe ngʼowebabbaire.
Babbaire tibeesigika ooti mwini oguwulunguta omu mbaizi.
58 Bamusunguwairye olwʼamasabo gaabwe,
ni bamutanula eibuba olwʼebifaananyi byabwe ebyokusinza.
59 OKibbumba oweyaboine bityo nʼasunguwala ino,
nʼalekesulira nakimo oIsirairi.
60 Yazwire omu Weemaye omu Siiro
omu yaabbanga ngʼali omu bantu.
61 Yawaireyo eSanduuku yʼeNdagaano ni bagiwamba,
yawaireyo akamanyiciryo kʼobwezyebwe nʼekitiisyakye omu bwezye bwʼomulabe.
62 Yasunguwaliire abantube,
nʼabaleka ni babaita nʼempiima.
63 Omusyo ni gumalawo abanyeete baabwe,
abaala baabwe ni bakayaku ababafumbirwa.
64 Abalabe baitire aBakabona baabwe nʼempiima,
era nandi baikirirya abanamwandu okubakunga.
65 Olwo kaisi oMusengwa nʼabba ooti alamukire mu ndoolo,
era ooti muzira enviinyo ogugicemwire.
66 Nʼakanjirirya abalabebe e nyuma,
ensoni egitalikoma ni gibakwata.
67 Cooka nʼalekesula abaizukulu ba Yusufu,
nandi nʼalonda ekika kyʼEfulaimu.
68 Wazira nʼalonda kika kya Yuda,
nʼoLusozi oSayuuni ebyasiima.
69 Nʼayombeka eWeemaye ooti kifookye ekyʼomwigulu,
nʼagigumya ino ngʼoweyakolere ekyalo ekyʼokubbaawo emirembe gyonagyona.
70 Yalondere omuweereryawe oDawudi,
nʼamutoola omu kiriisiryo.
71 Yabbaire azwa ku kuliisya ntaama egyonkesya,
nʼamutoolayo alabirirenge eibyaire lya Yaakobbo,
ibo oIsirairi abantube okububwe.
72 Era oDawudi yabalabiriire omu mwoyo omusa,
ngʼabafuga nʼobukugu.