79
EZabbuli yʼAsafu.
Okusabira eigwanga eidembe
1 Oo Kibbumba, abanamawanga balumbire ekyalokyo,
basuucirye eYeekaaluyo entukulye kyomuliko.
OYerusaalemi bakirekere gawumpu.
2 Emirambo gyʼabaweereryabo
bagirekeire binyonyi kulya.
Emibiri gyʼabeesigwabo, gisuukire kyokulya kyʼebisolo.
3 Basukire omusaaye gwʼabantubo ooti maizi,
omu Yerusaalemi mwonamwona,
ni wabulawo kadi abaliika!
4 Abaliranwa baiswe batuzuma,
abatuli okumpi batunyooma era ni batujerega.
5 Oo Musengwa, walitusunguwalira paka di? Mirembe gyonagyona?
Eibubalyo lyalyeyongera kusiiriirya ooti musyo?
6 Oirye obusungubwo ku mawanga
agatakumaite,
nʼoku bwakabaka
obutakusinza.
7 Ekyo kityo olwʼokubba bajigiricirye abʼeibyaire lya Yaakobbo,
ni bajigirica nʼobutyami bwabwe.
8 Tiwatubonereza olwʼebibbibibbi byʼabazeiza baiswe.
Oyanguwe okutukwatira ekisa,
olwʼokubba tuwoiremu amaani.
9 Oo Kibbumba, omununuli waiswe otubbeere,
olwʼekitiisya kyʼeriinalyo.
Otununule era otusoniye ebibbibibbi byaiswe
olwʼeriinalyo.
10 Lwaki oleka abanamawanga okutubuulya bati,
“OKibbumba waanywe ali yaina?”
Weerage omu banamawanga nga tubona,
ngʼonyaaŋa olwʼomusaaye gwʼabaweereryabo ogususukire.
11 Owulisisye okukenyera kwʼabasibe.
Olwʼobwezyebwo obwʼamaani,
onunule abebasaliire ogwʼokufa.
12 Oo Musengwa, abaliranwa baiswe obasasulemu emirundi musanvu
olwʼokukujooga.
13 Awo iswe abantubo, entaama gyʼomu kiriisiryokyo,
twakwebalyanga bulijo emirembe gyonagyona.
Mulembe ku mulembe,
twadeebereranga okukuwuuja.