80
Eeri akubbembera abembi. Okwigono lyʼebimuli byʼendagaano. EZabbuli yʼAsafu.
Okusabira eigwanga
1 Oo Mulabiriri wa Isirairi, otuwulisisye,
iwe alungamya eibyaire lya Yusufu ooti kiraalo kyʼentaama.
Iwe atyama oku ntebe yʼobwakabaka aakati wa bakeruubbi;
2 oyake omumaiso gʼekika kyʼEfulaimu nʼekya Bbenyamini nʼekya Manase.
Olage amaanigo,
oize otununule.
3 Oo Kibbumba, otwirye obuyaaka,
otuloleku nʼeriiso eryʼekisa,
twezye okulama.
4 Oo Musengwa oWabwezye Bwonabwona,
walituuca di ngʼosunguwalira
okusaba kwa bantubo?
5 Agebakunga gebanywa,
era obalekere ni banywa amaliga mu bungi.
6 Otusuucirye nsonga yʼokulwanagana kwʼabaliranwa baiswe,
era abalabe baiswe batujerega.
7 Oo Kibbumba oWabwezye Bwonabwona, otwirye obuyaaka,
otuloleku nʼeriiso eryʼekisa,
twezye okulama.
8 Watoire omuzabbibbu e Misiri,
nʼobbinga abʼamawanga agandi omu kyalo kyabwe, nʼogukomayo.
9 Wagutegekeire amatinde, ni gukoma emirandira,
era ni gumalaku ekyalo.
10 Ebyoleerya byagwo ni bimalaku ensozi,
amasaga gaagwo ni gabiika emivule emiwanvu.
11 Gwatandabaire ni gutuuka oku Nyanza oMeditereniani,
era amasaga ni gatuuuka oku Mwiga Ewufulaate.
12 Kale tete lwaki ovunirewo ebikomera byagwo,
kaisi bonabona ababitawo ni baibbanga ebineneka byagwo?
13 Embiizi egyʼomu kigona gigubebenya,
era ebibbumbe ebyomi byonabyona ebyʼomu kigona bigulya.
14 Oo Kibbumba oWabwezye Bwonabwona, otwiriryemu,
olole ansi ngʼosinzirira omwigulu obone,
era ofeeyo oku muzabbibbu ogwo,
15 iwe onanyere oguweekomeire nʼengaloyo endiiro,
nʼonsebukira iwe onanyere oguweekuliirye.
16 Omuzabbibbugwo bagutemerewo ni bagwoca nʼomusyo,
obakaawukire ngʼonyiikaire, bajigirike.
17 Neye oleke obukuumibwo bubbe kwʼoyo oguwalondere okubba owuwo,
omwana wʼomuntu iwe onanyere oguwasuucirye owʼamaani;
18 awo titwalikuzwaku.
Otwirye obuyaaka, kaisi tukuwuujenge.
19 Oo Musengwa oWabwezye Bwonabwona otwirye obuyaaka,
otuloleku nʼeriiso eryʼekisa,
kaisi tulame.