81
Eeri akubbembera abembi. EZabbuli yʼAsafu.
Olwembo olwʼoMukolo gwʼoBusiisira
1 Mwembere oKibbumba nʼeisangaalo, iye amaani gaiswe.
Mubbookooke nga mwembera oKibbumba wa Yaakobbo!
2 Mutoolere okwemba, mukubbe akagoma,
nʼotongoli avuga okusani nʼenkana.
3 Mufuwe ekondeere ngʼomweri gwankumasuka,
nʼowegubbeera mulamba, oku lunaku olwʼomukolo gwaiswe.
4 Ekyo kityo olwʼokubba eryo iteeka eeri oIsirairi,
kiragiro kya Kibbumba wa Yaakobbo.
5 OKibbumba oweyalumbiire ekyalo kyʼe Misiri,
yalisuucirye iteeka eeri oYusufu.
Ni mpulira olutumu oluntategeera nga lukoba luti:
6 “Nabatiikwire ebyabakaluubiriranga oku mabega gaabwe,
engalo gyabwe ni ngiwuumulya okuginga emigugu gyʼamatafaali.
7 Owemwabbaire omu bugosi, mwankungiriire ni mbanunula,
nabairiremu omu kubbwatuka kwʼeraadu.
Nabagezeserye oku nsulo gyʼe Meribba.
8 “Bantu bange,
muwulire mbalabula.
Isirairi, singa nʼompulisisya!
9 Mwinywe timwabbangamu okibbumba ogondi,
timwakotamyanga emitwe okusinza okibbumba owʼabanamawanga.
10 Ninze oMusengwa, oyo oKibbumba waanywe,
eyabatoire omu kyalo kyʼe Misiri.
Mwasamye eminwa gyanywe, era nagiizulya.
11 “Neye abantu bange kadi kumpulisisya,
oIsirairi kadi kungondera.
12 Kale zena ni mbawaayo eeri obukakanyali bwʼemyoyo gyabwe,
bakole ekibabona bati niikyo ekituuce.
13 Oo singa abantu bange bampulisisya!
Kale singa oIsirairi atambulira omu manzira gange!
14 Nandibbaire mwangu okuwangula abalabebe,
ni mbonereza abamuwalana.
15 “Abo abacaawa oMusengwa bandinyolokokeire omumaisoge,
era ekibonerezo kyabwe kyandibbaire kyʼemirembe gyonagyona.
16 Neye inywe nandibawaire ekyokulya ekyʼengaano egikiraku obusa,
ni mbaikutya nʼomujenene ogwʼomwibbaale.”