83
EZabbuli yʼAsafu. Olwembo.
Esaala yʼokuwangula abalabe
1 Oo Kibbumba tiwasirika-busiriki
nandi nʼonyega, Kibbumba tiwasirika nandi nʼobbaaku ekyokola.
2 Obone abalabebo ngʼobwebali kwegugunga,
abo abakucaawa ngʼobwebali kwediima.
3 Basala enkwe omu lukuujukuuju okulumba abantubo.
Bateesa okukola akabbikabbi oku bantubo abootaka eino.
4 Bakoba bati, “Mwize tujigirice eigwanga lyabwe,
kaisi eriina Isirairi balyerabirire nakimo!”
5 Bateesera aamo ni baikirizagania,
ni bakola endagaano okukulwanisya.
6 Mulimu abantu bʼEdomu nʼaBaisimairi,
nʼabʼe Mowaabbu nʼaBakagali,
7 nʼabʼe Gebbali nʼabʼAmoni, nʼabʼAmereki,
nʼabʼe Firisitiya, nʼabantu bʼe Tiiro.
8 Era nʼAsiiriya yeegaitire nabo,
okubbeera eibyaire lya Luuti.
9 Obakole ngʼowewakolere aBamidiyaani
era ngʼowewakolere oSisera nʼokabaka oYabbini oku mwiga oKisoni.
10 Bajigirikiire Endoli
era emirambo gyabwe ni givundira oku ngulu.
11 Abeekubbemberi baabwe obakole ngʼowewakolere Olebbu nʼoZeebbu.
Owangule abakungu baabwe ngʼowewawangwire oZebba nʼoZalumuuna.
12 Abo bakobere bati, “Oleke twetwalire
ekyalo kya Kibbumba kibbe kyaiswe.”
13 Nʼolwekyo, Kibbumba wange, obaduumuule ooti nkungu ompunga ogwaluguulya,
ooti mpunga owaafuwa ebisusungu.
14 Ooti musyo owegwoca ekibira,
ooba ooti nnimi gyʼomusyo owegyoca ensozi,
15 woobba obalukutye
nʼompungawo, era obatiisye nʼompungawo owʼamaani.
16 Oo Musengwa, obaswazire nakimo,
kaisi bayezye okukunoonia.
17 Oleke ensoni gibakwate baswale, era babbe omu kutya enaku gyonagyona,
oleke bajigirike nga baswaire.
18 Kaisi bategeere bati niiwe oMusengwa,
era bati niiwe wenkani oNambulaku aMwagaagana, afuga ekyalo kyonakyona.