84
Eeri akubbembera abembi. EZabbuli yʼabʼeibyaire lya Koola.
Okwegomba okubona enyumba ya Kibbumba
1 E gyobba nga wasa,
iwe Musengwa oWabwezye Bwonabwona!
2 Njoya ino, era mpulira nfa
okubona oMusengwa e gyabba.
Omwoyo gwange nʼomubiri gwange,
byekunga nga byegomba oKibbumba onanyere obwomi.
3 Dala ontaaye yeerukira ekinyumba,
era onamusiisi yena yeerukira ekisaasiriro
e gyayezya okwalulirya obwanabwe,
okumpi nʼebyotobyo,
iwe Musengwa oWabwezye Bwonabwona, era oKabaka wange era oKibbumba wange.
4 Bʼenkabi abo ababba omu nyumbayo,
nga bakuwuuja bulijo.
5 Bʼenkabi abo ngʼamaani gaabwe gazwa giri niiwe,
ngʼemyoyo gyabwe giri ku lugendo lwʼe Sayuuni.
6 Nga webabita omu Kiinamo ekibeeta oBbaka,
obateekeramu amaluba;
oikendi owa mwiro akiizulya nʼebitaba byʼamaizi.
7 Baaba nga beeyongera amaani,
paka nabuli moiza oweyaliboneka omumaiso ga Kibbumba omu Sayuuni.
8 Oo Musengwa oWabwezye Bwonabwona owulire okusaba kwange,
ompulisisye Kibbumba owa Yaakobbo.
9 Oo Kibbumba iwe atutaasa,
owuwo oguwasukireku amafuta omulole omu maiso.
10 Olunaku olumo omu luuga lwʼeYeekaaluyo,
lukiraku 1,000 egimmalira awandi.
Kasinga mba oku mulyango gwʼenyumba ya Kibbumba wange,
okukiraku okubba omu nyumba gyʼababbibabbi.
11 Ekyo kityo olwʼokubba oMusengwa niiye eisana era engabo.
OMusengwa atulaga ekisa era nʼatuwa nʼekitiisya.
Mpaawo kintu ekisa ekyaima
abo abatambulira omu bwomi obunambulaku ekyokubunenya.
12 Oo Musengwa oWabwezye Bwonabwona,
nga wʼenkabi iye oyo akwesiga!