85
Eeri akubbembera abembi. EZabbuli yʼabʼeibyaire lya Koola.
Eidembe eeri eigwanga lya Kibbumba
1 Oo Musengwa, walagire ekisa eeri ekyalokyo,
wairiryewo enkabi gya Isirairi.
2 Wasoniire ensobi gyʼabantubo,
nʼobatoolaku ebikole byabwe ebibbibibbi byonabyona.
3 Wakomerye okubasunguwalira,
nʼokubabbaaku ekiruyi.
4 Oo Kibbumba oMununuli waiswe, otwirye obuyaaka,
era olekeraawo okutusunguwalira.
5 Watusunguwaliranga enaku gyonagyona?
Obusungubwo tibwalikoma?
6 Otwiryemu amaani buyaaka,
kaisi iswe ababo tujaagaanirenge mwiwe.
7 Oo Musengwa, otulage okutakakwo okutakoma,
era otununule.
8 Oleke mpulisisye oKibbumba iye oMusengwa ekyakoba,
olwʼokubba asuubiza abantube eidembe, ibo abatuukiriryebe
owebatairayo omu busirusiru bwabwe.
9 Dala mutegeke okununula abamutya,
kaisi ekitiisyakye kibbenge omu kyalo kyaiswe.
10 Okutaka okutakoma nʼobwesigwa bisisinkana,
obutuukirirye nʼeidembe bigwangana omu bifubba.
11 Obwesigwa buzwera oku kyalo,
era obutuukirirye businzirira omwigulu ni biika ansi oku kyalo.
12 Dala oMusengwa yatuwa ebisa,
era ekyalo kyaiswe kyabbaamu amakungula mangi.
13 Obutuukirirye bwamwebbembera,
ni bumwewulirya enzira.