86
Esaala ya Dawudi.
OKibbumba atukwatire ekisa
1 Oo Musengwa, otege ekitwikyo, era onjiremu,
olwʼokubba ndi mudoobi era ndamba.
2 Okuume obwomi bwange, olwʼokubba ndi mwesigwa egyoli.
Niiwe oKibbumba wange,
onnunule nze omuweereryawo akwesiga!
3 Oo Musengwa, onkwatire ekisa
olwʼokubba nkwekungirira okumalaku olunaku.
4 Oo Musengwa
onsangaalisye nze omuweereryawo
olwʼokubba neewaayo egyoli.
5 Oo Musengwa, oli musa era osoniya,
oli wʼekisa kinene eeri abo bonabona abakusaba.
6 Oo Musengwa, owulire okusaba kwange,
owulisisye nga nkwekungirira okunkwatira ekisa.
7 Omu kiseera ekyʼebigosi nkwegairira,
olwʼokubba onjiramu.
8 Oo Musengwa, omu bakibbumba mpaawo aali ooti niiwe,
waire aali nʼebikole ooti bibyo.
9 Oo Musengwa, amawanga gonagona agewakolere
gaizanga egyoli ni gakusinza.
Era gagulumalyanga eriinalyo.
10 Ekyo kityo olwʼokubba oli wʼamaani, era okola ebyewuunyisya.
Niiwe oKibbumba wenkani.
11 Oo Musengwa, ondage enzirayo,
kaisi ntambulirenge omu mazimago.
Oyegesye omwoyo gwange okukuweereryanga niiwe wenkani,
kaisi nkutyenge.
12 Oo Musengwa iwe oKibbumba wange, nakuwuujanga nʼomwoyo gwange gwonagwona.
Nagulumalyanga eriinalyo emirembe gyonagyona.
13 Olwʼokutakakwo okutakoma okubitiriri egyendi,
wandamirye okutaika e magombe.
14 Oo Musengwa, abeekudumbalya bansetukiireku,
ekibbula kyʼabantu abaŋeŋese bataka kunjita,
ibo abantu abatakuseegaku.
15 Neye iwe Musengwa oli Kibbumba alumirwa era owʼekisa.
Olwawo okusunguwala, oizwire ekisa ekibitiriri nʼobwesigwa.
16 Ondoleku era onkwatire ekisa,
ompe nze omuweereryawo amaanigo,
onnunule nze omwana wʼomuweereryawo omukali.
17 Ompe akamanyiciryo akalaga obusaabwo,
kaisi abancaawa babone era baswale,
olwʼokubba iwe Musengwa ombeereire era ongumirye.