88
Eeri akubbembera abembi. EZabbuli yʼabʼeibyaire lya Koola. Olwembo.
Okusaba oKibbumba obubbeeri
1 Oo Musengwa iwe oKibbumba annunula,
nkwekungirira omusana nʼobwire.
2 Oleke okusaba kwange kutuuke egyoli.
Ontegere ekitwi nga nkwekungirira.
3 Ekyo kityo olwʼokubba obwomi bwange bwizwire bigosi,
era ngonerera kufa.
4 Bambalira mu baabo abaika e magombe,
ndi ooti muntu onambulaku obubbeeri.
5 Ndi ooti muntu ogubalekeswire omu bafu,
ndi ooti baadi abebaitire abagalaamiriire omu magombe,
abootokaali oyebukirya.
Era abootokaali obbeera.
6 Onteekere omu kiina ekyabiriri eino,
omu bifo ebyʼendikiirya era ebyabiriri.
7 Obusungubwo bunkaluubirira ino,
bungadya ino ooti mayengo.
8 Ozwereireku abakaagwa bange abʼoku mwoyo ni banjawukanaku,
onsuucirye kyʼengigina egibali.
Ndi musibe omu kifo omuntayezya okuwunuka.
9 Amaiso gandoolere olwʼenima.
Oo Musengwa, nabuli lunaku nkusaba okumbeera.
Nsiirya engalo gyange egyoli nga nkwegairira.
10 Ebyewunyo obikolera bafu?
Abafu bazwa e magombe ni bakuwuuja?
11 Okutaka okutakoma okulaga baabo abali e magombe,
ooba obwesigwabwo obulaga mu kifo kyʼokujigirika?
12 Ebyewunyobyo babimanyira mu kifo kyʼendikiirya,
ooba obutuukiriryebwo mu kyalo kyʼabo abebeerabiire?
13 Neye nze Musengwa, nakwekungirira,
era nabuli makeezi nkusaba.
14 Oo Musengwa, lwaki ondekesula?
Lwaki onkubbira omugongo?
15 Mbaire nʼokugada era kumpi nʼokufa, kuzwera nakimo mu mavuvuka gange.
Ebitiisirirya ebyontuuciryeku bimpaire okweraliikirira.
16 Obulwabwo bummalawo,
ebitiisirirya ebyontuuciryeku binjigirica.
17 Bineeruguulirirya ooti mataba okumalaku olunaku,
binzingizira nakimo.
18 Ontoireku abanange nʼabatake bange,
endikiirya niiyo omukaagwa wange amba okumpi.