89
Endagaano ya Kibbumba nʼoDawudi.
OKibbumba mwesigwa
1 Nayembanga oku kutaka okutakoma okwa Musengwa enaku gyonagyona.
Obwesigwabwo nabulangiriranga emirembe gyonagyona.
2 Nkoba nti, “Okutakakwo okutakoma kubbeerererawo emirembe gyonagyona,
obwesigwabwo tibuwaawo, bubbeerererawo ooti igulu.”
3 Wakobere oti, “Nkolere endagaano nʼomulonde wange.
Omuweererya wange oDawudi mmulayirira nti,
4 ‘Omwibyaireryo niimwo omwazwanga abakabaka emirembe nʼemirembe,
era ni njemereryawo obwakabakabwo emirembe gyonagyona.’ ”
5 Oo Musengwa, eigulu likuwuujenge olwʼebyewunyobyo,
obwesigwabwo bwona babuwuujenge omu lukumbaana lwʼabatukulye.
6 Naani oku bali omwigulu ogubayezya okugeraagerania oku Musengwa?
Kiriina oku bibbumbe byʼomwigulu ekiri ooti Musengwa?
7 Omu lukiiko lwʼabatukulye omwigulu oKibbumba bamutyera nakimo ino,
wʼentiisya okukiraku bonabona abamweruguuliriirye.
8 Oo Musengwa oWabwezye Bwonabwona, naani aali ooti niiwe?
Oo Musengwa, oli nʼobwezye era oli mwesigwa mu byonabyona.
9 Ofuga enyanza nʼokwefukuula kwayo,
amayengo owegeedumbya ogaikaikania.
10 Wasusungwire oLakabbu nʼafa.
Abalabebo wabasalaanicirye ngʼokolesya obwezyebwo obwʼamaani.
11 Eigulu liryo, nʼekyalo kikyo,
ekyalo nʼebikirimu niiwe owabikolere.
12 Wabbumbire amambuka nʼamaserengeta.
Olusozi oTabboli nʼoKerumooni gyembera eriinalyo omwisangaalo.
13 Iwe oli wʼobwezye ino,
engaloyo yʼamaani, engaloyo endiiro bagigulumalyanga.
14 Obutuukirirye nʼobwenkanya niibyo omusingi gwʼentebe yʼobwakabakabwo.
Okutaka nʼobwesigwa bibonekera omu byokola.
15 Oo Musengwa, nga bʼenkabi abo abamaite okukuwuuja omu nyembo,
abatambulira omu kitangaala kyʼokubbaawokwo.
16 Oku lulwo basangaala okumalaku olunaku,
era bajagaana olwʼobutuukiriryebwo.
17 Ekitiisya kyabwe nʼamaani gaabwe bizwa eeri niiwe.
Olwʼekisaakyo otuwa obuwanguli.
18 Oo Musengwa, niiwe engabo yaiswe,
niiwe oMutukulye wa Isirairi, owatuwaire okabaka waiswe.
19 Omu biro ebyʼeira
watumwire nʼabaweereryabo abeesigwa omu kwolesebwa oti,
“Mpaire omulwani owʼamaani obubbeeri.
Ngulumalya yooyo ogunalondere omu bantu bonabona okubba Kabaka.
20 Nkivumbwire nti oDawudi, yaabba muweererya wange,
mmulondere nga mmusukaku amafuta amawonge okumwawula okubba kabaka.
21 Namuwanga amaani,
era olwʼobwezye bwange yaabbanga mugumu.
22 Abalabebe tibamuwangulenge,
nʼababbibabbi tibamuyingenge.
23 Nalijigiricirya omumaisoge abalabebe,
era ni mmalawo abo abamucaawa.
24 Naabbanga mwesigwa egyali era namulaganga okutaka okutakoma,
era omu liina lyange yalisuna obuwanguli.
25 Yafuganga enyanza,
engaloye endiiro nagiteekanga oku miiga.
26 Yankobanga ati, ‘Niiwe oBbaabba era oKibbumba wange,
niiwe eIbbaale lyange omu neebisa era omununuli wange.’
27 Nalimusuuca mubere wange,
yaligulumala okukiraku abakabaka bonabona abʼoku kyalo.
28 Namukwatiranga ekisa bulijo,
era nakuumanga endagaano yange naye emirembe gyonagyona.
29 Omwibyairerye niimwo omwazwanga abakabaka emirembe nʼemirembe,
nʼobwakabakabwe bwabbeerererangawo nga tibuwaawo ooti igulu.”
30 “Neye abʼeibyairerye owebalijeemera amateeka gange,
ni bazwa oku biragiro byange,
31 owebalinyooma amateeka gange,
ni bamenya ebiragiro byange,
32 nalibakubba omwigo olwʼebibbibibbi byabwe,
era nalibafaamuula olwʼokubbenga kwabwe.
33 Neye tinalirekeraawo okumutaka,
waire okuleka okutuukirirya ekinamusuubizire.
34 Tinalimenya endagaano yange naye,
waire okucuusamu ebinamusuubizire.
35 Nalayiire omulundi gumo lumala olwʼeriina lyange eritukulye nti,
oDawudi tinalimubbeya.
36 Eibyairerye lyabbeererangawo emirembe nʼemirembe,
nʼobwakabakabwe bwabbeerererangawo ooti isana iryo eritakoma okwaka.
37 Bwabbeerererangawo emirembe nʼemirembe ooti mweri owegwaka,
ni gukola obujulizi obwesigwa angulu.”
38 Neye atyanu Kibbumba omulekeswire
era omuzwireku, osunguwaliire okabaka oguwasukireku amafuta.
39 Omenyerewo endagaano egiwakorere nʼomuweereryawo,
era enguleye ogimumire omu nkungu.
40 Ebikomera byʼekibugakye obimenyere,
engagagye ogimalirewo.
41 Abatambuli ababitawo bonabona banyaga ebintubye,
asuukire nseko gyʼabaliranwabe.
42 Owaire abamulwanisya amaani ni bamuwangula,
abalabebe bonabona ni bajaagaana.
43 Ebyokulwanisyabye obisuucirye ebitagasa,
era omu lutalo omulekere nandi nʼomubbeera.
44 Omutoireku obwezyebwe obwʼobwakabaka
entebeye oyʼobwakabaka ogidyakire okwitakali.
45 Omukendeiryeku emyanka egyʼobuvuvukabwe,
era nʼomuswazaswaza.
46 Oo Musengwa, walituuca di okwebisa? Mirembe gyonagyona?
Nʼobusungubwo bwalikomya di okwoca ooti musyo?
47 Oyebukirye ngʼobwomi bwange obwebuli obumpi.
Oyebukirye ngʼabantu bonabona abewabbumbire, babbaawo kaseera-buseera ni bafa.
48 Muntuki omwomi etiyalifa?
Naani ayezya okweramya obutaika e magombe?
49 Oo Musengwa, okutakakwo okutakoma okwasookere kuli nkonaki,
iwe omwesigwa okuwasuubizire oDawudi?
50 Oo Musengwa, oyebukirye ngʼobwebali kuzumanga abaweereryabo,
era ngʼobwenguminkiriza ebizumi byʼabantu bonabona.
51 Oo Musengwa, abalabebo bazuma oguwasukireku amafuta,
nabuli e gyayaba bamuzuma.
52 OMusengwa bamuwuujenge emirembe gyonagyona!
Amiina era Amiina.