EKITABO EKYOKUNA
90
(Zab 90–106)
Esaala ya naabbi Musa.
Omuntu wʼakaseera katono
1 Oo Musengwa,
obbaire kiirukiro kyaiswe, emirembe nʼemirembe.
2 Ensozi nga gikaali okubbaawo,
era ngʼokaali okubbumba ekyalo nʼebintu byamu,
emirembe nʼemirembe niiwe oKibbumba.
3 Abantu obairyayo omwitakali,
ngʼokoba oti, “Mwireyo omwitakali inywe abaana bʼabantu.”
4 Emyanka olukumi omumaisogo
giri ooti lunaku olumo olubita,
ooba ooti kisisimuko omu kiire.
5 Otoolawo obwomi bwʼabantu ngʼekirooto owekizwawo.
Bali ooti isubi erimeruka amakeezi,
6 linyirira ni likula nakusani,
neye owebwirugalira libba liwotokere era likalire.
7 Obusungubwo butumalawo,
era ensisi etukwata olwʼobulwabwo.
8 Okwonoona kwaiswe okuteekere omumaisogo,
nʼebikole byaiswe ebibbibibbi ebyʼekyama obiteekere e gyʼobibonera.
9 Obulwabwo busalaku enaku gyʼobwomi bwaiswe,
obwomi bwaiswe buwaawo mangu ngʼomuyeero.
10 Emyanka gyʼobwomi bwaiswe gikoma ku 70,
ooba 80 owetubba abacaati,
kaisi nga giizwire kufambikana na bigosi.
Gyaba mangu, ni tuzwawo.
11 Naani amaite amaani gʼobusungubwo,
nʼobulwabo obuzweraku ni bakutya?
12 Otwegesye okumanya obwomi bwaiswe ngʼowebuli obumpi,
kaisi tubbe bʼamalabuki.
13 Oo Musengwa, otwiriryemu. Walituuca di ngʼotusunguwaliire?
Okwatire iswe abaweereryabo ekisa.
14 Nabuli makeezi otulagenge okutakakwo okutakoma,
kaisi twembenge nga tujaagaana era tusangaalenge omu bwomi bwaiswe bwonabwona.
15 Otuwe eisangaalo okumala ebiseera nga bidi omu watugadiirye,
era okumala emyanka ngʼegitwabbaire omu bugosi.
16 Otuganye iswe abaweereryabo tubone ebikolebyo ebyʼamaani,
nʼabaizukulu baiswe bona babone ekitiisyakyo.
17 Oo Musengwa, iwe oKibbumba waiswe, otuwenge enkabi,
emirimo gyaiswe ogiwenge enkabi.
Dala owenge emirimo gyaiswe enkabi.