91
Obwesige bwʼoyo atya oKibbumba.
OKibbumba niiye atukuuma
1 Nabuli ayaba eeri oNambulaku aMwagaagana okusuna obukuumi,
nabuli eyaabbanga omu bukuumi bwʼoyo oWabwezye Bwonabwona,
2 yamukobanga ati, “Niiwe ekiirukiro kyange era niiwe olugaga lwange,
niiwe oKibbumba wange; niiwe oguneesiga.”
3 Dala niiye eyakununulanga eeri emitego egibategere,
nʼeeri okawumpuli ajigirica.
4 Iye yakulabiriranga,
era omu biyayabye mu wasunanga obukuumi.
Obwesigwabwe bwabbanga ngaboyo okukukuumanga.
5 Tiwatyenge entiisya yʼobwire,
waire akalaso akebalasa omusana,
6 ooba olumbe olwiza omu ndikiirya,
waire amaani gʼendikiirya agajigirica esaawa omukaaga egyʼomusana.
7 Abantu 1,000 abakuliranire bayinza okufa,
nʼabantu 10,000 abakweruguuliriirye ni bafa,
neye iwe akabbikabbi nandi ni kakutuukaku.
8 Waliringirira-bulingiriri nʼobona nʼagago
ekibonerezo kyʼomubbimubbi.
9 Olwʼokubba osuucirye oMusengwa kiirukirokyo,
iye oNambulaku aMwagaagana omukuumiwo,
10 akabbikabbi tikalikutuukaku,
era mpaawo kazigizigi akalituuka oku kisitokyo.
11 Ekyo kityo olwʼokubba yalagiranga abamalaikabe
okukukuuma nabuli gyoyaba.
12 Balikubbaka omu ngalo gyabwe,
kaisi nandi weekontola ekigerekyo okwibbaale.
13 Walyemyaga ompologoma nʼoyema oku nkongomasaka,
walyemyaga ompologoma omukambwe nʼoyema oku mpiri.
14 OKibbumba akoba ati, “Nalimununula olwʼokubba antaka.
Era namukuumanga olwʼokubba angondera.
15 Oweyansabanga namwirangamu,
omu bigosi naabbanga naye.
Nalimununula ni mmugulumalya.
16 Nalimuwangaalya ino
era nalimununula.”