92
EZabbuli. Olwembo olwʼoku Saabbaato.
Olwembo olwʼokuwuuja
1 Oo Musengwa, kisa okukwebalyanga,
nʼokwemba okukuwuujanga iwe oNambulaku aMwagaagana.
2 Kisa okutumula oku kutakakwo okutakoma nabuli makeezi
nʼoku bwesigwabwo nabuli kiire,
3 nga tukubba enkana eyʼenkosi eikumi
era nga tukubba otongoli.
4 Oo Musengwa, ebyokola binsangaalya,
nnyemba nʼeisangaalo olwʼebyo ebyokola.
5 Oo Musengwa, ebyokola nga bikulu,
nʼebyoseega nga bigosi okubitegeera!
6 Omuntu omumayaani tamanya kinu,
era omusirusiru takitegeera ati,
7 newankubbaire ababbibabbi bameruka ooti isubi,
era bonabona abakola ebibbibibbi ngʼebibakola bibitamu,
balibajigirica emirembe gyonagyona.
8 Neye iwe Musengwa, bakugulumalyanga emirembe gyonagyona.
9 Oo Musengwa kyʼamazima kiti,
abalabebo balijigirika.
Bonabona abakola ebibbibibbi balibasalaanica.
10 Neye nze ompaire amaani ooti ga mbogo,
era onsukireku amafuta amasa.
11 Mboine ngʼowangula abalabe bange,
abanjiigaania bakungire ni mpulira.
12 Abatuukirirye babba kusani ooti kikolo kyʼensansa,
babba bagumu ooti mivule gyʼomu Lebbanooni.
13 Babba ooti misaale egibakomere okumpi nʼenyumba ya Musengwa,
ni gikula nakusani oku luuga lwʼeYeekaalu ya Kibbumba waiswe.
14 Omu bukaire gisigala nga gibala ebibala,
gisigala nga mijimu era nga ginyirira.
15 Ekyo kiraga kiti oMusengwa musa,
era niiye eibbaale lyange omu neebisa, era mwiye mpaamu bubbibubbi.