3
1 Hanuaboi ta, egu mahuta patana dekenai,
egu lalokau tauna lau tahua,
lau tahua to lau davaria lasi.
Ia dekenai lau boiboi,
to ia haere lasi.
2 Lau toreisi, hanua dekenai lau loaloa,
ariara dekenai bona dala maragidia dekenai,
egu lalokau lau tahua.
Lau tahua, to lau davaria lasi.
3 Hanua gimaia taudia be hanua ena gabu ta ta,
dekenai idia raka lao neganai,
idia ese lau idia davaria.
Lau ese idia dekenai lau tai henia, lau gwau,
“Egu lalokau tauna umui itaia lasi, a?”
4 Idia lau rakatania,
bona nega daudau lasi lalonai,
egu lalokau tauna lau davaria.
Lau dogoatao auka,
bona egu imana dekena amo lau ruhaia lasi,
ia mai, bona egu sinana ena ruma dekenai lau hakaua.
Lau ia havaraia hahine ena daiutu dekenai,
egu lalokau lau abia vareai lao.
5 Ierusalema hahine e,
umui lau oda henia inai,
uda nanigosi bona uda dia namodia dainai,
do umui gwauhamata,
aiemai ura henia dekena amo,
ai do umui boiboi lasi,
ai do umui hanogaia lasi,
ela bona ai sibona ai ura do ai noga.
Ane ihatoina
Hahine ia abia
6 Unai be dahaka,
tano kaukau dekena amo ia mai noho,
kwalahu ena ori toana bamona?
Ia be mai ena bonana namo herea,
muramura pauda ladana muro dainai,
hoihoi taudia ese idia hoia muramurana.
7 Itaia, inai be Solomona ena terona, helai gauna,
Israela ena tuari taudia goadadia ibounai 60 ese,
Solomona ena terona idia gimaia noho.
8 Unai tau 60 ibounai,
be tuari kaia iusilaia diba momo,
bona tuari dekenai idia manada vadaeni.
Edia tuari kaia be ta ta,
edia gaba gaudia dekenai idia atoa hegaegae,
hanuaboi ena gari gaudia do idia koua totona.
9 King Solomona ena terona, idia huaia helai gauna,
be Lebanona audia dekena amo ia karaia.
10 Terona ena aena be siliva dekena amo ia koua,
bona iena haba be golo dekena amo ia koua.
Terona ena pilo bona ena lalona,
be dabua, ena kala kakakaka sisina dekena amo ia koua.
Inai dabua be Ierusalema hahine ese,
mai lalokau danu idia hatua namonamo.
11 Siona hahine e, do umui raka mai,
King Solomona do umui itaia.
Iena korona be iena kwarana dekenai,
bona Solomona ena headava dinana dekenai,
iena sinana ese unai korona ia henia.
Solomona ena moale dinana be unai.