6
Anôtô geoc tau lasê ma kêkalem Jesaia
Gêdêŋ jala, taŋ kiŋ Usia gêmac êndu naŋ, aê galic Apômtau tau gêŋgôŋ lêpôŋ kiŋŋa teŋ ŋaô lôlôcgeŋ, ma nê ŋakwê baliŋ kêsêp e kêjalec lôm dabuŋ ŋalêlôm auc. Aŋela Serapim sêkô Apômtau ŋaô. Êsêac samob nêŋ magê 6-6 kêtôm êsêacgeŋ. Êsêac sêkwa laŋôŋanô auc ŋa magê luagêc ma sêkwa eŋkaiŋ auc ŋa magê luagêc ma sêlôp ŋa magê luagêc. Ma aŋela teŋ gêmôêc biŋ gêdêŋ teŋ ma sêmôêc gelom-gelom gêja gebe
“Lausiŋ undambêŋa nêŋ Apômtau
eŋ dabuŋ, dabuŋ, dabuŋ.
Ênê ŋawasi gêjam nom samucgeŋ auc e gêdêŋ ŋamadiŋ.”
Ma ŋaôndu, taŋ kêsa aŋela teŋ awasuŋ naŋ, kêwiwic andu ŋataoŋ e jadauŋ kêkôm lôm ŋalêlôm auc.
Go kasôm gebe “Ijoc, aêma oc janaŋa, gebe aê ŋac togêdôcôlic ŋatêmui ma gamoa gawiŋ lau-gêdôŋôlic-ŋatêmuiwaga, mago matocanô galic Kiŋ, lausiŋ undambêŋa nêŋ Apômtau.”
Go Serapimnêŋ teŋ kêgandoŋ jalana teŋ sa aŋga altar ma kêkôc kêsêp lêma, go gêlôb gêdêŋ aê gêmêŋ mêŋkêmoasac aê aocsuŋ ma kêsôm gebe “Gôlicgac me, aê kamoasac gêdômôlic, tec geseŋ nêm tôp su ma kêsuc nêm sec ôkwi.” Go gaŋô Apômtau awa kêsôm gebe “Aê oc jasakiŋ asa êna ma asa oc naêtu aêacma ŋacjaeŋ.” Go aê kasôm gebe “Aê tec gamoa, ôsakiŋ aê.” Ma eŋ kêsôm gebe “Naôsôm êndêŋ lau tônê gebe
‘Aŋô biŋ amboac aŋô, mago aŋô êtu tôŋ atom.
Alic gêŋ amboac alic, mago ajala atom.’
10 Ôŋgôm lau tonaŋ nêŋ ŋalêlôm ŋadani êsa
to taŋeŋsuŋ êôc auc
ma mateŋ êmôp,
gebe moae sêlic gêŋ ŋa mateŋanô
ma sêŋô biŋ ŋa taŋeŋsuŋ
to sêjala biŋ ênêc nêŋ ŋalêlôm e sênam tauŋ ôkwi ma ôliŋ ŋajam êsa.”
11 Tec katu kênac gebe
“O Apômtau, aê jasôm lasê e êndêŋ ondocgeŋ.”
Ma eŋ gêjô aê aoc gebe
“Ôsôm e êndêŋ taŋ malac samob êtu gasaŋ
ma ŋamalac maleŋmê
ma andu samob êtu tuc
ma gamêŋ e ŋagêlêŋ naŋ.
12 Ma Apômtau oc êtiŋ lau nasêŋgôŋ gamêŋ jaêcsêga,
ma malac gasaŋ taêsam ênêc gamêŋ tonec ŋalêlôm.
13 Ma embe lau 10-10 nêŋ tageŋ-tageŋ gacgeŋ sêmoa,
oc senseŋ êsêac êtiam amboac sêsap kamem me kaleloŋ
e ŋakatuc gacgeŋ êkô.”
Ŋakatuc tau tonaŋ ŋawê dabuŋ tau.