17
Amolmol Tesalonaika ane ilgum ve ines Pol gabu Silas
1 Pol gabu Silas ivang ve ile love itlek nam dabe Ampipolis be tis Apolonia be gabu imbielk Tesalonaika, be nangge etok amolmol Juda ane as lum mateu ane ti givarkei etok.
2 Be Pol gilgum ane kulkul weik ebe gilgum givang givang ok. Ei gisov lum mateu ane nok aplo gile givin Sonda be kakie givin eisir Juda be iwel is-ate avos gisov yaun ebe giengk Pomate ane kapia ok, eisir ilgum dang-etok gitangi Sonda aitol.
3 Pol ginei Pomate ane mateu ane dabe gitangi eisir be ginei, “Pomate atob nemb Kilisi amol ebe ve nemb eitit ru ok be ninme be atob ninggas vavavne be nimat vunu bekob matawe be nimdil vukuri nangge taku gimat ane. Be Yisu nok ete ayeu ganei ane yaun gitangi yem nik, ete ei Amol ebe ve nemb eitit ru ok.”
4 Amolmol subu iute Pol ane yaun ebe ginei ok be isov sulu as yaun ane lu ge. Be amolmol dubi bamo ti nangge Grik, eisir etok ebe inei uye be es miengk gitangi Pomate ok be tis eisir ebe tis ares ok arwas-gen, eisir etok ete tepwengge isov Pol gabu Silas as yaun ane lu givin weik etok ge.
5 Bemem eisir Juda ane tas-vadbu ve ili ebe ande amolmol bamo-ngge ile ivin Pol gabu Silas ok, beti ile iro amolmol bwam-bwam ane subu ebe kulkul ma ve is be ivang nam luvwe sinsi-nge ok sut be inei yaun walang ano gisov amolmol aplos, be gilgum amolmol tas-vavis anongge. Beti eisir nok ile ivarkei Jeson ane nam avo avut be itut ane nam avo ponge ve indi Pol gabu Silas be in-gas is intangi amolmol tepwengge inde.
6 Bemem eisir irek sulu love ili ma, beti bais gisov Jeson tis amolmol bui ane subu be ilgum eisir tiate tiate bekob inggas is itangi bambamo nam etok ane ile be inei, “Eisir etenik ebe ilgum gen tiate nangge nam dabe walang ok gitangi ge be ilgum be amolmol tas-vavis giriv be gira ok etenik, be galkik ete ande inme imbweg ivin eitit nangge and nam nik.
7 Be Jeson gigas eisir ipil ane nam ile. Be eisir etenik ebe bwais ve insov amol bamo ebe geb amolmol dabin ok Sisa ane yaun ane lu ok. Be inei yaun gitangi ebe ve tanei ok ite be inei, ‘Amol ti ebe ve nemb amolmol dabin ok ete gibweg nik, amol nok are Yisu.’ ”
8 Amolmol nam dabe etok ane tepwengge tis as amolmol bambamo ebe em is dabin ok iute yaun etok love ikuri vunu-ngge be kokwangg be ele-leinge.
9 Be inei gitangi Jeson tis ane nune-ngge ve inavgo as yaun etok, bekob bais vier ve eisir be ile ve ivang.
Pol gabu Silas emb kulkul nangge nam dabe Beria
10 Be givin tambok etok ge amolmol bui ane ipelk be ihlin Pol gabu Silas be ivang Beria ane ikwai. Sulu ivang love imbielk Beria, bekob gabu isov Juda as lum mateu ane aplo ile.
11 Be amolmol Juda ane ebe imbweg Beria ok, aplos dadani weik Juda subu ebe imbweg Tesalonaika ok ite ma, eisir etok iute yaun be isov ane lu ge. Be as-mate walang ok eisir isam yaun ebe giengk Pomate ane kapia ok veik indi inei Pol gabu Silas as yaun etok ano me ma?
12 Be amolmol anongge meihlang amolmol bui ane, be avie gaptol Grik ane subu ebe tis ares ok be tis amol gaptol Grik ane subu ok aplos givin Yisu weik etok ge.
13 Bemem givin ebe eisir Juda ebe imbweg Tesalonaika ok iute binge ve Pol ginei Pomate ane mateu binge gitangi amolmol Beria ane ok, beti eisir imdil ile nam dabe etok ve inalgum amolmol be aplos tiate veik inro gen tiate it-kitin vukuri.
14 Beti amolmol bui ane nangge Beria iute binge be ihlin Pol gile gihlang alus seukie-ngge gikwai be Silas gabu Timoti imbweg ete Beria ok yapin.
15 Amolmol ebe ivin Pol be ile ok, ivang love imbielk nam dabe ti are Atens bekob inumul nangge etok. Be Pol geb yaun giengk eisir ve indumul inde be inei nitangi Silas gabu Timoti ve intangi ei inde seukie-ngge.
Pol ginei mateu nangge Atens
16 Pol gibweg Atens ok ve gisge Silas gabu Timoti, be aplo bunam molge ve gili ebe eisir nam dabe etok ane emb kulkul ve inei uye be es miengk gitangi pomate bingkasop ane ano anongge ok.
17 Beti ei gisov lum mateu ane aplo gile be kakie givin eisir Juda be tis amolmol ebe nangge Juda ite ok ebe inei uye be es miengk gitangi Pomate matawe ane ok, be tis eisir ebe iro is-ate sut isov nam luvwe ok givin tis as-mate walang ok.
18 Be nangge etok amolmol Grik ane as amolmol dubi ailu imbweg. Eisir dubi ti ital is inei Epikurian, be dubi ti ital inei Stoik. Be eisir nok as amolmol subu ebe itpweng gen arkares ok eisir es valir ve avos ge gitangi Pol. Be subu inei, “Amol etenik ebe ginei yaun sinsin-ge ok, be ei veve ninei yaun ret etenik?” Be amolmol subu imdil be inei, “Wat ei ginei yaun gipil nam dabe subu as pomate me?” Pol ginei mateu be ginei Yisu Kilisi ane yaun ebe gimdil vukuri nangge taku gimat ane ok lavo gitangi eisir, beti eisir yaun etok.
19 Beti eisir inggas ei itangi bambamo as kasa lavo ile be iutani ei be inei, “Amei tangg-amei givin ve anaute yaun vaku ete mie gob gitangi amolmol ok vukuri kob.
20 Ve amei aute mie gunei yaun subu meng-gihlang nangglus ti beti amei tangg-amei givin ve anatpweng yaun etok ane dabe are kob.
21 (Amolmol Atens ane be tis amolmol taku ti ane ebe ile imbweg etok ok tepwengge as ete ve inaute be inei yaun ebe meng-gihlang vaku vaku ok yapin.)
22 Beti Pol givarkei amolmol bambamo ebe iute yaun ok nas nangge kasa lavo be ginei, “Ayeu gali yem amolmol nam dabe etenik ane unei mateu gitangi pomate bingkas-kasop ane gwang-ne molge.
23 Ve galkik ayeu gavang yem-aim nam luvwe be gali gen bambamo ebe yem upasang ve unei uye be os miengk gitang-tangi ok, love gali taku da ane (alta) ti be iro yaun ti dang-eteik. ‘Etenik Pomate ebe eitit tali be tatpweng are ite ok ane taku da ane (alta) etenik.’ Beti ayeu ve nanei Pomate ete yem uli ei ite be unei uye be os miengk gitangi ok lavo nitangi yem.
24 Pomate ebe gipasang gulumb tis nalk be tis gen walang etenik ok, ete ei gulumb be nalk ane tivie. Be ei gibweg lum yamar ebe amolmol bais itav ok ite ma.
25 Be ei gini-ni ebe girek ate ve gen ti ane, be giutani eitit amolmol ve tanemb ei ru be tanemb gen etok nitangi ei ok ite. Ma molge. Ve ei ate geb amolmol be gilgum be matawas be inggas wavin, be geb tis ane gen walang ok givin.
26 Amolmol walang ete tambweg nalk etenik ok and tumbund dongke-ngge, be ei geb eitit and sawa ebe ve tanvang matawand ok, be geb and nalk be tis and nam ebe ve tanambweg ok yapin.
27 Pomate gilgum gen etok veik amolmol inrek ei, be ginei gitangi okob atob lolos invang love kob indi ei. Ve Pomate givang aikawe gikwai amol ti ite molge. Ve amolmol subu inei dang-eteik inei,
28 ‘Gisov Pomate ane ge beti eitit tambweg matawand,’
Be yem ate etenik ok, aim amolmol subu ebe itpweng yaun are ok inei givin weik etok ge inei;
‘Eitit ok Pomate ane natu-nggen eitit givin weik etok ge.’
29 Be Pol ginei, Dang-etok be ginei Pomate ane natu-nggen eitit givin, okob tan-tau ete tamb tuvweng ve Pomate gipil gol me silva me vat ebe amolmol tas-gitung be bais ipasang ok!
30 Warik amolmol itpweng gen are ite be ilgum gen giriv be gira, bemem givin etok Pomate ginei yaun ti gitangi eisir ite be na gile gili eisir ge. Bemem galkik as-mate etenik Pomate ginei gwang-ne molge be ginei, amolmol tepwengge nangge nam dabe walang ok inro is-ate vukir.
31 Ve ei ande geb as-mate ti gile givarkei gikwai ebe ve nilgum amolmol nalk ane tepwengge as yaun ok. Be ei ane luev ebe atob nilgum amolmol as yaun ok, atob vie be roro dongke. Be ei geb amol ti gikwai ebe ve nemb as-mate etok dabin ok. Amol nok ete Pomate ges ru gitangi eitit ve ges ei itin nangge taku gimat ane vukuri.
32 Amolmol iute ebe Pol ginei asonge amolmol inamdil nangge taku gimat ane ok, be gilgum molok gile ei. bemem eisir subu inei, Bwayage-kob ame anaute miam yaun etenok vukuri.
33 Beti Pol gikwai eisir be gile.
34 Bemem amolmol subu aplos givin ei be ivang ivin ei, eisir nok ete as amol ti are Daionisia ei amol bamo ti ebe gibweg taku yaun ane ok, be avie ti are Damaris be tis amolmol subu givin.