34
Zimbaka za isi ya Kanaani
1 Mndewa Imulungu kamulongela Musa,
2 “Walongele Waizilaeli vino, vonda mwingile mwiisi ya Kanaani, isi iniwagwelele iwe yenu, zimbaka za isi yenu zokuwa kamba vino.
3 Umwambu wa kusini imbaka yenu yokuwa kulawa kuluwala lwa Sini mbaka kuna imbaka ya Edomu. Yosongela mwambu wa kudilawila zuwa wa umwambu wa kusini ako kuihelela ibahali ya Mkele.
4 Abaho imbaka yenu yogendelela kusini kubitila kuna inzila ya Akilabimu na kubitila Sini mbaka Kadeshi Balinea, umwambu wa kusini. Kulawa kuko yobita mwambu wa kasikazini kwa kuchola mwambu wa kudihongela zuwa mbaka Hasali Adali na yobita mbaka ako Azimoni.
5 Kulawa Azimoni yobita kwa kuchola kuna ikizanda cha Misili na yohelela hana ibahali ya Meditelania.
6 “Imbaka yenu kwa mwambu wa kudihongela zuwa yokuwa bahali ya Meditelania.
7 “Imbaka yenu kwa umwambu wa kasikazini yokuwa kulawa bahali ya Meditelania mbaka kulugongo lwa Holi.
8 Kulawa kulugongo lwa Holi yobitila kuna inzila ichola Hamati, na yogendelela mbaka ako Sedadi,
9 yobitila ako Zifuloni, na yohelela ako Hasali Enani, ayo iyo imbaka yenu kwa umwambu wa kasikazini.
10 “Imbaka yenu kwa umwambu wa kudilawila zuwa yokuwa kulawa Hasali Enani na yobitila ako Shefamu.
11 Kulawa Shefamu yogendelela kubitila Libila, mwambu wa kudilawila zuwa wa Aini, abaho imbaka ayo yobita hasi kuna umwambu wa kudilawila zuwa wa lamba da Kineleti,
12 abaho yohumulukila kulozela kuna ulwanda lwa Yolidani mbaka kuna ibahali ya Mkele, zino azo zimbaka nne za isi ayo.”
13 Avo, Musa kawalongela Waizilaeli, “Ino ayo isi yonda mwiihazi kwa kubwanha simbi, isi iyalagize Mndewa Imulungu gagweleligwe makabila tisa na nusu.
14 Kabila da Lubeni na kabila da Gadi, na nusu ya kabila da Manase wagweleligwa uhazi wao kamba viweli mzing'holo zao.
15 Makabila gago mabili na nusu wapata uhazi wao ako umwambu wa kudilawila zuwa wa lwanda lwa Yolidani uilola na buga da Yeliko dikalile umwambu wa ulwanda.”
Ivilongozi onda wawagwelele iwanhu isi ya Kanaani
16 Abaho Mndewa Imulungu kamulongela Musa,
17 “Imulava nhosa Eleazali na Yoshua mwanage Nuni awo onda wawagwelele iwanhu isi ayo kamba uhazi wao.
18 Vivija usagule kilongozi imoja kulawa kila kabila ili waitaze kuigola isi ayo.
19 Gano gago matwaga ga awo ivilongozi.
Kabila da Yuda kokuwa Kalebu mwanage Yefune.
20 Kabila da Simeoni kokuwa Shemueli mwanage Amihudi.
21 Kabila da Benjamini kokuwa Elidadi mwanage Kisiloni.
22 Kabila da Dani kokuwa Buki mwanage Yogili.
23 Kabila da Manase mwanage Yusufu kokuwa Hanieli mwanage Efodi.
24 Kabila da Efulaimu mwanage Yusufu kokuwa Kemueli mwanage Shifitani.
25 Kabila da Zabuloni kokuwa Elisafani mwanage Palinaki.
26 Kabila da Isakali kokuwa Palitieli mwanage Azani.
27 Kabila da Asheli kokuwa Ahihudi mwanage Shelomi.
28 Kabila da Nafutali kokuwa Pedaheli mwanage Amihudi.”
29 Wano awo iwanhu walagizwe na Mndewa Imulungu wawagwelele Waizilaeli isi ayo ya Kanaani kamba uhazi wao.