35
Mabuga ga Walawi
1 Mndewa Imulungu kalonga na Musa kudibawe da Moabu, behi na lwanda lwa Yolidani uilola na buga da Yeliko dikalile umwambu wa ulwanda, kamulongela,
2 “Walongele Waizilaeli kamba kulawa mna uuhazi onda wagweleligwe wawagwee Walawi mabuga ga kukala na hanhu ha kudimila fugo zao kumgwazo wa gago gamabuga.
3 Mabuga gago gokuwa gao, hewo okala mumo na odima ng'ombe na fugo zao ziyagwe.
4 Ihanhu ha kudimila honda muwagwelele awo Walawi ako kumgwazo wa gamabuga kila mwambu kuwe na utali wa magulu magana mane na malongo matano kulawa ako kugamabuga.
5 Avo hanhu hose ha kudimila hokuwa na utali wa magulu magana tisa kila umwambu wa dibuga, na dibuga dokuwa aho hagati ya hanhu aho ha kudimila ako kumgwazo wa dibuga.
6 Muwagwelele Walawi mabuga sita ga kukimbilila, ili kamba munhu kamkoma miyage bila kulonda kodaha kukimbilila kuko. Vivija muwagwelele mabuga gayagwe malongo mane na mbili.
7 Mabuga gose kwa gose gonda muwagwelele Walawi gokuwa malongo mane na nane, muwagwelele mabuga gago hamoja na ihanhu ha kudimila fugo zao.
8 Gamabuga gonda walave Waizilaeli kuwagwelela Walawi iwe kamba iwanhu mdikabila dijo viweli, kamba kabila dina wanhu wengi dilave mabuga mengi na kamba kabila dina wanhu wadodo dilave mabuga kidogo. Kila kabila dilave mabuga gake mbuli ya Walawi kamba isi yao iwagweleligwe viili.”
Mabuga ga kukimbilila
(Kumbukumbu 19:13; Yoshua 20:1-9)
9 Abaho Mndewa Imulungu kamulongela Musa,
10 “Walongele Waizilaeli kamba vonda muloke lwanda lwa Yolidani na kwingila mwiisi ya Kanaani,
11 musagule mabuga ga kukimbilila, ili kamba munhu kamkoma miyage bila kulonda kodaha kukimbilila mumo.
12 Mabuga gago gokuwa hanhu hanogile ha kukimbilila ili imunhu ayo yamkomile miyage sikuyakomigwe na awo onda wambwezele kwa acho kiyatendile yang'hali hanauzigwa kuulongozi wa umting'hano.
13 Musagule mabuga sita mbuli ya hanhu ha kukimbilila.
14 Mna gamabuga gago sita gonda musagule, mabuga madatu gawe umwambu wa kudilawila zuwa wa lwanda lwa Yolidani, na madatu gawe mwiisi ya Kanaani.
15 Mabuga gago gokuwa hanhu ha kukimbilila mbuli ya Waizilaeli na iwanhu baki iwokala na hewo siku zose hebu iwanhu baki iwokala hamoja na hewo kwa siku ndodo. Munhu yoyose yahamkoma miyage bila kulonda kodaha kukimbilila mumo.
16 “Lakini kamba munhu kamtowa miyage kwa kinhu cha zuma, na kumkoma, avo munhu ayo kokuwa mkomaji na heyo yakomigwe.
17 Munhu yoyose yahamtowa miyage kwa dibwe, na kumkoma, munhu ayo kokuwa mkomaji na heyo yakomigwe.
18 Munhu yahamtowa miyage kwa biki na kumkoma, munhu ayo kokuwa mkomaji na heyo yakomigwe.
19 Ndugu wa imunhu ayo yakomigwe yambwezele, na yamkome mkomaji ayo vonda yaiting'hane na heyo.
20 “Vivija kamba munhu komwihila miyage abaho komsung'ha hebu komtupila kinhu,
21 hebu komtowa ng'honde na kumkoma, avo imunhu ayo yamtowile miyage na kumkoma na heyo yakomigwe. Ndugu wa imunhu ayo yakomigwe na heyo yambwezele kwa kumkoma yahamting'hana.
22 “Lakini kamba munhu komsung'ha miyage bila kulonda hebu komtupila kinhu bila ugomvi wowose,
23 hebu munhu yahapigisa dibwe na kumkoma munhu bila kulonda, na kuno hagombile na imunhu ayo yamkomile,
24 avo umting'hano wose waigelegeze mbuli ayo, mbuli ya ayo yamkomile miyage na ndugu yake imunhu yakomigwe yolonda kumbwezela ayo imkomaji, kamba malagizo gano vigali.
25 Awo umting'hano umsegese ayo imunhu yakomile mmakono ga ndugu yake ayo yakomigwe, na wambweze kudibuga da kukimbilila kuko kuyakimbilile. Yakale kuko mbaka vonda yafe imulava nhosa mkulu yasaguligwe kwa kugidiligwa mavuta.
26 Lakini munhu ayo yakomile yahalawa kunze ya dibuga da kukimbilila,
27 abaho ndugu yake imunhu yakomigwe kamgoga ako kunze ya dibuga da kukimbilila na kumkoma, avo ayo kokuwa hatendile dihile kwa kumkoma munhu ayo.
28 Kwavija imunhu ayo yamkomile miyage kolondigwa yakale mumo kudibuga da kukimbilila mbaka vonda yafe imulava nhosa mkulu, lakini yahafa ayo imulava nhosa mkulu kodaha kubwela ukae kumwake.
29 “Malagizo gano gawe kwa ulelo wenu wose, hanhu hohose honda mukale.
30 “Munhu yoyose yonda yamkome miyage, yatagusigwe ifa kwa usindila wa wanhu wabili na kugendelela onile kija kitendigwe. Munhu yoyose sikuyatagusigwe ifa kwa usindila wa munhu imoja.
31 “Sikumubokele malipo gogose ili kumuhonya munhu mkomaji, mkomaji yoyose yahatagusigwa ifa, kolondigwa yakomigwe.
32 Sikumubokele malipo gogose kulawa kwa munhu yakimbilile kudibuga da kukimbilila ili kumtenda yabwele ukae kumwake yang'hali hanakufa imulava nhosa mkulu.
33 Mwahatenda vivo moifitiza isi yenu imukala, kwavija ukomaji oifitiza isi, na kuduhu nhosa yonda ilavigwe ili kuitenda ing'ale, isi ikomeligwe munhu ila kwa kumkoma imunhu yamkomile miyage.
34 Sikumuifitize isi imukala, isi ayo inikala niye vivija, kwavija niye Mndewa Imulungu nokala hagati yenu mweye Waizilaeli.”