36
Uhazi wa watwanzi wasoligwe
1 Abaho vilongozi wa lukolo lwa Gileadi mwanage Makili na Makili mwanage Manase na Manase mwanage Yusufu wachola kulonga na Musa na vilongozi wayagwe wa ng'holo za Waizilaeli.
2 Walonga, “Go mkulu, Mndewa Imulungu kakulagiza uwagwelele isi ayo wanhu wa Izilaeli kamba uhazi wao kwa kubwanha simbi, vivija kakulagiza uwagwelele wandele wa ndugu yetu Selofehadi uhazi wa tatao.
3 Lakini hewo wahasoligwa na Waizilaeli wa makabila gayagwe, uhazi wao osegela kumwetu na ochola kwa iwanhu wa gamakabila gonda wasoligwe, avo uhazi wetu siye ohunguka.
4 Mna inyimwilinyimwili ya kulekeswa, uhazi awo opetigwa hamoja na uja wa kabila donda wasoligwe, avo kabila jetu honda dipate uhazi awo kabili.”
5 Avo Musa kawagwaa Waizilaeli lagizo dino kulawa kwa Mndewa Imulungu, kawalongela “Wanhu wa kabila da ulelo wa Yusufu walonga goya.
6 Avo vino vivo viyalagize Mndewa Imulungu mbuli ya wandele wa Selofehadi, odaha kusoligwa na wambigalo wowose owalonda, lakini wambigalo awo walawe mdikabila jao,
7 ili uhazi wa Waizilaeli sikuuhamizwe kulawa kabila dimoja kuchola diyagwe, kila Mwiizilaeli yaulole uhazi wa kabila jake.
8 Mtwanzi yoyose yeli na uhazi mna gamakabila ga Waizilaeli, kolondigwa yasoligwe na munhu wa kabila jake, ili kila Mwiizilaeli yasole uhazi wa iwahenga zake.
9 Avo kokuwa kuduhu uhazi onda uhamizwe kulawa kabila dimoja kuchola diyagwe. Kila kabila da iwanhu wa Izilaeli digoge uhazi wake.”
10 Avo awo iwandele wa Selofehadi watenda kamba Mndewa Imulungu viyamulagize Musa.
11 Avo Mala na Tiliza na Hogila na Milika na Nuhu, awo iwandele wa Selofehadi wasoligwa na ndugu zao waubanzi wa tatao.
12 Wasoligwa mzing'holo za kabila da Manase, mwanage Yusufu, na uhazi wao usigala mdikabila da tatao.
13 Gano gago malagizo ga Mndewa Imulungu gayawagwelele Waizilaeli kubitila Musa ako kudibawe da Moabu, behi na lwanda lwa Yolidani uilola na buga da Yeliko dikalile umwambu wa ulwanda.