8
Bai Saulu andyúngila nkono ing'ano yakumpedya kwake.
 
Saulu ankupapata Liganisha
Napanelo kutunduvangila muliduva lyolyo, shindyúmilila shititimbu shakupapatigwa liganisha, yani shipinga shavakwoda váshipagwa pa Yelusalemu. Nadoni vakwoda vandívamwadikanianga pa Yelusalemu vanavo kutukutila mumakaja a ku Yudeya na a ku Shamaliya kanji vamyombe vandíijalila pa Yelusalemu. Vanu vakunjopa Nnungu vandítwala mili umwe Shiteva kuka ndashika na vanínnilila namene. Napanelo Saulu alota kumalidya liganisha, ashindainjila muding'ande uti dyavakwoda apita avakamula valume na vakongwe auka ndavajela nkalaboshi.
Pilipo ankuwisha ntenga ku Shamaliya
Napanelo avalá vamwadilikanénge vashindauka vavalanganga lilove. Pilipo nae paalaladile kunjini wa ku Shamaliya ashindavavalangangila venentete Klistu. Dimbumba dyavanu kwaunapamo dishindamwishimu Pilipo mwaa vashindamwigwa shana namene vyashitangola na vashindona vimanyikilo vyashitenda mwaa vanu vavénavo majini mashapu, anavo ashindauma mumili mwave akuta namene na vakudidimanga madodo pamo na vakukwava vashindapona. Nadoni panjini awo lishindapagwa lipuwilo lyoe namene.
Napanelo panjini wowo, andípagwa munu jumo walina Simoni. Munu aju muwakati wapanyuma pake ashindatandedya vinu vyashaviavi vyashivatikiniyanga vashamaliya na kulitenda kuva munu wakujowa. 10 Simoni vanu uti va ku Shamaliya bila kumpambula munu vashindamwishimu namene na vashindatangola doni, “Munu aju ni dimongo dya Nnungu dishamégwa ‘Ding'umene.’ ” 11 Nae vashamaliya vashindamwishimu namene mwaa dimindi dyoe ashindavatikiniyanga na vitendo vyake vyashaviavi. 12 Kanji Pilipo pavalangenge ntenga wambone wautawala wa Nnungu na yalina limwe Yesu Klistu, valume na vakongwe vashindapata ubatisho. 13 Ata mpaka jo mwene Simoni momo andíkulupila kutwala nanae kupata ubatisho na ngwengwe ashindamwoda Pilipo alaledya shana vimanyikilo na vyamakango vikumene víshitandeka kutwala nae kushanga doni.
14 Napanelo vyamyombe vapagwíte pa Yelusalemu pavigwite doni ku Shamaliya vanu vandiitikila lilove lya Nnungu, vaníntumidya Patulu namu Nshuwau koko. 15 Vakawike pa Shamaliya vandívashwalidya pakulota vampate Imumu Wanashwe 16 mwaa Imumu Wanashwe avele akanava kunshulukila munu ata jumo pakati pave ila vandípata ubatisho palina limwe Umu Yesu. 17 Bai vanavo vandívavikila makono kutwala kumpata Imumu Wanashwe.
18 Napanelo Simoni akone doni, Imumu ankuvashulukila vanu kwaindila yavamyombe kuvavikila makono, nae andyúmya njuluku avape vamyombe 19 aashidoni, “Nanangu ngupa madalaka lolo kwambangidya nikammikila munu woewoe makono ampate Imumu Wanashwe.” 20 Kanji Patulu kushidoni, “Jaikila kushena na njuluku wako wo. Da wako wona kenga inudyo ya Nnungu vashuma na njuluku? 21 Wako haunapagwa shinu ata padyoko nkati mushimadengo ashi mwaa ntima wako haunava shinu washalowa pamevo pake Nnungu. 22 Lijugulange, leka nnugu wakunyata wauvenavo! Njugwe Umu nakapanji andakulivaliva shabaa yamuntima wako. 23 Nangu ninkukwona wako kuva umunu wakukubyaa liu lyakupunda apo na ungave-shaliya undikutawala.” 24 Kutwala Simoni kushidoni, “Shonde, mwenu nangu ngujugwila kumwe Umu kwambangidya vyamutangola hashinapagwe shakungutandeka.” 25 Bai vamyombe vakaumye ushuda na vakatangole lilove lyake Umu, vandyújila ku Yelusalemu kupita vavalanganga ntenga wambone mumakaja oe avashamaliya.
Pilipo ankumbatisha mwitiyope
26 Napanelo njelo wake Umu andímwaulila Pilipo kushidoni, “Panganika uke nkono wakwina shilambo utumila indila yúma pa Yelusalemu kwalalela ku Gasha.” Ayo ivelé kushimbweshe. 27 Pilipo kutwalinneu mwanda. Mwe! Nae kumwona munu jumo wavamuníle avele nanangalaledi nkumene umwe umu nkongwe wa ku Etiyopiya walina Kandaki munu áshaangangalanga mali uti amwe umu ajo. Nae aukile ku Yelusalemu ndalipudya kwa Nnungu. 28 Pashuja àikele mulingishi lyake ashindashomya shidingo shalyamba shimwe nkúlava Ishaiya. 29 Bai Imumu Wanashwe andímwaulila Pilipo kushidoni, “Vandika lingishi lyo upite woda!” 30 Pilipo kutumanuma mpaka palingishi kutwala kumwigwa munu jo ashomya shidingo shalyamba shimwe nkúlava Ishaiya Pilipo kumudya, “Da vyaushomya vyo unkumanya shana mana ake?” 31 Mwitiyope kushidoni, “Ngulota kumanya dashi akapali munu ánguvalangangila?” Bai nae apalá anínjugwangila Pilipo akwele mulingishi vaikale pamo. 32 Napanelo lipungu lyamaandiko lyashishomya lishishidoni,
 
“Vanintwala kenga mwavanantwalila ngandolo wavamuukanavo kukunshinda,
mo mwanamalalila ngandolo pavankaja magwimbu,
nanae momo hajamwile ikanywa.
33 Vanintanila na havampele shaliya,
halakile udukulu,
mwaa shingumi shake vandyovya mushilambo.”*
 
34 Bai mwitiyope andímudya Pilipo, “Ninkukujugwa, da nkúlava malove ala apa amwamba nyani? Alyamba jo mwene kwali amwamba munu junji?” 35 Napanelo Pilipo kutunduvangila mulipungu alyo lyamaandiko andyúka ammalangangila munu ajo ntenga wambone umwe Yesu. 36 Vauka mushu na shimwanda shave, vandíwika pashinu pavéle medi kutwala mwitiyope kumwaulila Pilipo doni, “Wako, medi ala apa. Da shipali shinu shingudingadínga shakungutadya napate ubatisho?” 37  38 Mwitiyope andílamulila kwimidya lingishi alilá, Pilipo namu nae kushulukanga kuukananga mmedi Pilipo kutwala kumbatisha. 39 Pavaumanenge mmedi, Imumu wake Umu aníntwala Pilipo; bai mwitiyope hangwene kavili kanji andyúka mushu na shimwanda shake apuwanga. 40 Bai Pilipo andílyona àvele panjini wa Ashoto. Nae ashindapita avalanganga ntenga wambone mumakaja uti mwashipita auka ku Shashaleya.
* 8:33 Lola Ishaiya 53:7-8. 8:37 Maandiko ainamba ya 37 nkati mumaandiko akala ashigalegu hapali.