10
Axamang Salakkam Mana Binadi
1 Baing Toxoratamona harua na Moses ba, “Ula rangua Pero, namua na nga ba ngalibu toxonoa xaung yanamindi toxodingdi daharing bu sanga ba ngalibu axamang haringina ngayuadi li liwe manadi,
2 bu anaxuya na garaimdi xaung garaim ranggindi ngahaxuya Isipdi haringina baru xaung bu ngalibu axamang haringindi ngayuadi liwe manadi baru. Binabu sanga ba axabia ba nga ba Toxoratamona.”
3 Binabu Moses Aron tang dila rangua Pero saing daharua na ba, “Toxoratamona, Urana mana Hibrudi, harua bila li: ‘Uhalisi hauxam mana utatuaung maxagia baru? Uyunga lipuxigudi ba dila, bu sanga ba disabu manga.
4 Nabu hauxam mana uyungadi ba dila, bing (bagu) buragina bagula ngaxap binadi (ma) maluxu mana numanumama.
5 Bagula dikaukau titi hataing longgalo bu lipu tela sanga ba bagu titia te. Bagula daxang masup anginga kaxukanadi duwauyu kimuya mana kuya bila siang aisiamdi (di)mu ba, xaung bagula disahi baruamtadi duwauyu mana xaidi.
6 Bagula dibaxagi mana numamdi xaung mana yanamimdi xaung Isip longgalo numadingdi. Axa li bauimtibuimdi kimbo mugangaimdi dibagu te, ungguti mana bungina dirung mana titia li laing hatata.’ ” Baing Moses xugia mala saing sauya Pero.
7 Pero yanamindi daharua na ba, “Bunging maxaxaya baru bagula lipua li tuxu kira (muraginia)? Uyunga lubadi ba dila, bu sanga ba disabu mana Toxoratamona Urana dingia. Ai! Isip(ka) hanggalang. Ubagu uxabia (alaba) teguyu?”
8 Binabu daxap Moses Aron tang dima muli rangua Pero. Harua na dingtang ba, “Sangau. Ala asabu mana Toxoratamona Urana angia. Ning ubala nga ba gaxarea (taxa) bagula dila.”
9 Moses haxuya ba, “Bagula am longgalo am gala—nanumamdi xaung mugangamamdi, garamam lupdi xaung nanuhangimamdi, xaung morumamdi. Namua na bagula am gatuxu taungua bu am gaiti Toxoratamona yanoa.”
10 Pero harua ba, “Si! Nabu ang longgalo ala, bagula tabagu rangrang ba Toxoratamona wa ranguang ba! Ne nga ba, bagula nganai mana axap hainimdi xaung garaimdi mala ranguang te! Ngabagu kuboluim dianoa abo ba alibu mam.
11 Tegu sibuna! Lupdi ding ganiding sanga ba dila disabu mana Toxoratamona, namua na xusungungama baing.” Baing disuka Moses Aron tang mala sangua Pero maxania.
12 Baing Toxoratamona harua na Moses ba, “Uraria rimama mahaing mala mana Isip, bu binadi ditalia titia saing daxang axamang longgalo disok titia, axamang baruamtadi duwauyu kimuya mana kuya bila siang aisiamdi (di)mu.”
13 Binabu Moses raria tukinoa mahaing mala mana Isip, saing Toxoratamona xap yang karagam ma yubua makisi mana titia sanga mana xaidap tela xaung yambong tela. Laing sup buraragina, baing yanga xap binadi dima ba.
14 Baing ditalia Isip longgalo saing dirung xumang sibuna mana titi ragung longgalo. Mugau ma axamang salakkam mana binadi bila ba te, saing bagula sok bila ba muli te.
15 Dikaukau titi hataing longgalo laing titia mutuxu. Daxang axamang baruamtadi duwauyu kimuya mana kuya bila siang aisiamdi (di)mu—axamang longgalo disok titia xaung xai marang longgalo. Xai, haidanga xaung waxu longgalo duwa titia Isip doxola mana axamang gamatandi.
16 Baing Pero gogolinga wagi Moses Aron tang dima saing harua ba, “Ngalibu kubolu diana na Toxoratamona Urana angia xaung nang.
17 Binabu uyunga kubolugu diana bunging tela muli, saing axusunga Toxoratamona Urana angia haringina ba xap axamang matiamga li mala sangua nga.”
18 Binabu Moses sok mala sangua Pero saing xusunga Toxoratamona haringina.
19 Baing Toxoratamona xugia yanga bu ma haringina bila sanga yuwaxa. Baing yanga ba xu binadi mala maluxuʼm Tek Sabuxana. Binadi disup sibuna maluxuʼm Isip ragung longgalo.
20 Ne Toxoratamona libu Pero toxonoa haring, saing hauxana ba yunga Isreldi ba dila.
Axamang Salakkam Mana Labiana
21 Baing Toxoratamona harua na Moses ba, “Uraria rimama mahaing mala sabalunia bu labiana kaukau titia Isip, labiana na bila ba laba buk bu duxunumia.”
22 Binabu Moses raria rimanoa mahaing mala sabalunia, saing labiang sibunoa kaukau Isip sanga mana xaidap tuwa.
23 Lipu tela sanga ba bagu rianoa te kimbo mesa haxa mauli te sanga mana xaidap tuwa. Ne Isrel longgalo ganangadingdi lulianoa wa manadi.
24 Baing Pero wagi Moses ma saing harua ba, “Ala asabu mana Toxoratamona. Hainimdi garaimdi xauna sanga ba dila ranguang. Ning moruimdi ding ganiding duwauyu.”
25 Ne Moses harua ba, “Tegu. Bing unai mana am gaxap morumamdi mala xauna bu am gaung teladi am gahananiadi na Toxoratamona Urana amia.
26 Morumamdi xauna bing dila ranguam. Tela bagula wauyu te. Bing teladi bagula am gahananiadi na Toxoratamona Urana amia. Ne bagula am ba am gaxabia te baruamtadi am gamogudi mana sabungamama mana Toxoratamona laing am gasok la ba.
27 Ne Toxoratamona libu Pero toxonoa haring, saing hauxana ba nai mana yungadi ba dila.
28 Pero harua na Moses ba, “Uhaya (maxagia)! Umaxania! Labu uma maxagia muli te! Xaidapka ubagu ramramogua muli, bagula umati baing.”
29 Moses haxuya ba, “Uharua maringina! Bagula ngama maxamia muli te.”