9
Axamang Salakkam Xap Morudi
1 Baing Toxoratamona harua na Moses ba, “Ula rangua Pero saing uharua na ba, ‘Toxoratamona, Urana mana Hibrudi, harua bila li: “Uyunga lipuxigudi ba dila, bu sanga ba disabu manga.”
2 Nabu unai mana dila te, utuxudiyu,
3 (bagu) Toxoratamona rimanoa bagula xap axamang salakkam sibuna ma xap morum longgalo—hosimdi, donkimdi, kamelimdi xaung bulmakaumdi, sipsibimdi xaung mememdi.
4 Ne Toxoratamona bagula hata kubolunoa libu mana Isrel morudingdi xaung Isipdi morudingdi. Isreldi asaxading tela bagula mati te.’ ”
5 Toxoratamona mogu xaidap maxanoa saing harua ba, “Buragina bagula Toxoratamona libu bila ba mana titia li.”
6 Baing ina naga, buragina Toxoratamona libu bila ba. Isipdi moruding longgalo dimati, ne Isreldi moruding tela mati te.
7 Pero soxi lipuxing teladi mala ba suli saing dibagu ba Isreldi moruding tela mati te. Ne Pero toxonoa haring saing nai mana lipuadi dila te.
Axamang Salakkam Mana Nabangdi
8 Baing Toxoratamona harua na Moses Aron tang ba, “Tang gala ubi taunganam yabanoa, saing asolia hayata rimaimia. Ala rangua Pero saing Moses (bing) ting mahaing maxania.
9 Bagula sok gagaba ri mana Isip titing longgalo, saing bagula libu nabangdi disok mana lipudi xaung asaxadi mana titia Isip hataing longgalo.”
10 Binabu tang daxap hayata mana ubi taunganam yabanoa saing dili Pero maxania. Moses ting mahaing, saing nabangdi disok mana lipudi xaung asaxadi.
11 Lipu sintukkamdi sanga ba dili Moses maxania, namua na nabangdi daxapdi xauna bila daxap riadingdi Isipdi.
12 Ne Toxoratamona libu Pero toxonoa haring saing lungu (Moses Aron) tang te, bila Toxoratamona harua na Moses ba.
Axamang Salakkam Mana Kuya Bila Siang Aisiamdi Dimu
13 Baing Toxoratamona harua na Moses ba, “Umesa buraraging sibuna, uli Pero maxania saing uharua na ba, ‘Toxoratamona, Urana mana Hibrudi, harua bila li: Uyunga lipuxigudi ba dila, bu sanga ba disabu manga.
14 Namua na bungina baguli axamang salakkamgadi ngasinadi bagula daharing sibuna, daxap yanamimdi xaung lipuximdi ing ganina te, bagula daxap ung sibum xauna, bu sanga ba uxabia ba mana titia hataing longgalo tela (muli) bila nga te.
15 Namua na ma laing hatata sanga ba ngararia rimagua ngatahaung xaung lipuximdi xaung businga haringindi disisiang sangua titia masup.
16 Ne ngayungaung ba uwa mana namua li naga, bu ngahatanga haringingagu sabanga naung, xaung bu yagua sabanga naxuyanganoa bagula sup mala mana titi longgalo.
17 Uitiitiung usoxauti lipuxigudiyu saing uyungadi ba dila te.
18 Binabu ulungu to. Bila buragina xaidap maxanoa li bagula ngalibu kuya bila siang asiamdi didoa sibuna dimu, dali kuya longgalo bila ba mana Isip unggutinganoa ma laing hatata.
19 Binabu hatata utabina ba daxap morumdi xaung xalingim longgalo duwa sabasabia (di)ma diyamengdi hawa urongia, namua na kuya bila siang aisiamdi bagula dimu mana lipu longgalo xaung asaxa longgalo daxapdi dima numia te xaung adi duwa sabasabia, saing bagula dimati.’ ”
20 Pero yanaminadi dimaxuwa mana Toxoratamona haruanganoa ba dahatuautu mala daxap lipuxiding oxata olanggamdi xaung morudingdi (di)ma hawa urongia.
21 Ne adi dahatumia Toxoratamona haruanganoa te diyunga lipuxiding oxata olanggamdi xaung morudingdi duwa sabasabia.
22 Baing Toxoratamona harua na Moses ba, “Uraria rimama mahaing mana sabalunoa bu kuya bila siang aisiamdi (di)mu mana Isip hataing longgalo—mana lipudi xaung asaxadi xaung axamandi disok Isipdi umangadingia.”
23 Moses raria tukinoa mahaing mana sabalunoa, baing Toxoratamona sina kaxaba xaung kuya bila siang aisiamdi, saing bilikbiliga bilik mari mana titia. Baing Toxoratamona libu kuya bila siang aisiamdi (di)mu mana titia Isip.
24 Kuya bila siang aisiamdi dimu haringina saing bilikbiliga bilik mala ma. Malasu ba dali ding longgalo disok mana Isip mana unggutinganoa ma laing xaidapka ba.
25 Mana Isip hataing longgalo kuya bila siang asiamdi (di)taha axamang longgalo duwa sabasabia—lipudi xaung asaxadi. (Di)taha saha axamandi disok umangia saing (di)munanggi xai longgalo.
26 Titi hataina Gosen, titi hataina Isreldi dirung mana ba, ing ganina xola mana kuya bila siang aisiamdi.
27 Baing Pero wagi Moses Aron tang dima. Harua nadi ba, “Bungina baguli ngalibu kubolu diana. Toxoratamona libu kubolu maringina, saing nga ngagabu lipuxigudi am galibu doa.
28 Usabu na Toxoratamona, namua na bilikbiliga xaung kuya bila siang aisiam haringindi sanga ba. Bagula ngayungang ba ala. Tabinangua mana awa (bing) sup.”
29 Moses haxuya ba, “Bungina ngasok mala sangua long sabangua, bagula ngararia rimagudi mahaing mala ngasabu na Toxoratamona. Kaxaba bagula sup saing kuya bila siang aisamdi bagula (di)mu muli te, bu sanga ba uxabia ba titia Toxoratamona inia.
30 Ne ngaxabia ba ung gugabu yanamimdi amaxuwa mana Toxoratamona Urana te.”
31 (Mana xaidapka baguba, kuya bila siang aisamdi (da)hanggalangia pilaks xaung bali longgalo, namua na bali toxondi disok ba xaung pilaks aningonoa sok ba.
32 Ne (da)hanggalangia wit xaung emer te, namua na disok teguyu.)
33 Baing Moses sauya Pero saing sok mala sangua long sabangua. Raria rimandi mahaing mala sabu na Toxoratamona. Kaxaba xaung kuya bila siang aisiamdi disup, saing kuya dimu mari titia muli te.
34 Pero bagu ba kuya xaung kuya bila siang aisiamdi xaung kaxaba disup, saing libu kubolu diana muli. Gabu yanamindi dilibu toxodingdi daharing.
35 Binabu Pero toxonoa haring saing nai mana Isreldi dila te, bila Toxoratamona harua Moses suxungunia (ba).