8
1 Baing Toxoratamona harua na Moses ba, “Ula rangua Pero saing uharua na ba, ‘Toxoratamona harua bila li: Uyunga lipuxigudi ba dila, bu sanga ba disabu manga.
2 Ne nabu unai mana dila te, (bagu) nga ba bagula ngasina axamang salakkam mana haxinggudi mana titim longgalo.
3 Nail bagula baxagi mana haxinggudi. Bagula dahaing ma maluxuʼm numam xaitamoxiama xaung numam lunoa xaung etuaʼm kabukabum kinungama, maluxuʼm yanamimdi numadingdi xaung etuaʼm lipuximdi, xaung maluxuʼm diramim taungamdi xaung minam salanga xaningxaninganamdi.
4 Haxinggudi bagula dahaing maung xaung mana lipuximdi xaung mana yanamim longgalo.’ ”
5 Baing Toxoratamona harua na Moses ba, “Ubala Aron ba, ‘Uraria rimama tuxu tukima etua mana lang sabangadi xaung lang maxamaxandi xaung lang gamolingandi, saing ulibu haxinggudi dahaing ma mana titia Isip.’ ”
6 Binabu Aron raria rimanoa etua mana Isip langindi, saing haxinggudi dahaing ma saing dikaukau titia.
7 Ne lipu sintukkamdi dilibu kubolu taininau mana haringingading hisangamdi. Ding xauna dilibu haxinggudi dahaing ma etua mana titia Isip.
8 Pero wagi Moses Aron tang dima, saing harua ba, “Usabu na Toxoratamona ba xap haxinggudi mala sangua nga xaung lipuxigudi, saing bagula ngayunga lipuximdi ba dila dahanania hananiangadi na Toxoratamona.”
9 Moses harua na Pero ba, “Wa rimamia. Ung ba umogu xaidap maxanoa ubo ba ngasabu ba hauliung, yanamimdi xaung lipuximdi ba ang xaung numamdi doxola mana haxinggudi. Bagula duwauyu mana Langga Nail ing ganina.”
10 Pero harua ba, “Buragin to.”
Moses haxuya ba, “Bagula wa bila uharua ba, bu (sanga ba) uxabia ba urana tela muli bila Toxoratamona Urana amia te.
11 Haxinggudi bagula diyungaung xaung numamdi, yanamimdi xaung lipuximdi. Bagula duwauyu mana Langga Nail ing ganina.”
12 Kimuya mana Moses Aron tang disauya Pero, Moses sabu haringina na Toxoratamona mana haxinggudi xapdi ma mana Pero.
13 Baing Toxoratamona libu bila Moses xusunga ba. Haxinggudi duwa mana numadi, numading rubindi xaung umangadi ding dimati.
14 Digung(gung)di bunudi (bunudi), saing titia buya mana samidingdi.
15 Ning/Ne bungina Pero bagu ba mauxanganoa sup, duduna saing lungu Moses Aron tang te, bila Toxoratamona harua ba.
Axamang Salakkam Mana Simaxakdi
16 Baing Toxoratamona harua na Moses ba, “Ubala Aron ba, ‘Uraria tukima (saing) utaha titi gagabinoa.’ Baing mana titia Isip hataing longgalo bagula gagaba sok simaxakdi.”
17 Tang dilibu bila ba. Aron raria rimanoa tuxu tukia (saing) taha titi gagabinoa, baing simaxakdi diri mana lipudi xaung asaxadi. Gagap longgalo maluxuʼm titia Isip (di)sok simaxakdi.
18 Ning bungina Isip(di) lipuxi(di)ng sintukkamadi dituba ba daxap simaxakdi masok mana haringingading hisangamdi, ding sanga te.
Simaxakdi duwa mana lipudi xaung asaxadi long longgalo,
19 binabu lipu sintukkamdi daharua na Pero ba, “Urana (rimang uxung) haringinganoa libu (bila li)!” Ning Pero toxonoa haring saing sanga ba lungudi te, bila Toxoratamona harua ba.
Axamang Salakkam Mana Langudi
20 Baing Toxoratamona harua na Moses ba, “Umesa buraging sibuna saing ula uragu mana Pero sok mala langia. Ugugunia uharua na ba, ‘Toxoratamona harua bila li: Uyunga lipuxigudi ba dila, bu sanga ba disabu manga.
21 Nabu uyunga lipuxigudi ba dila te, (bagu) bagula ngasina langudi ditaliaung xaung yanamimdi, ditalia lipuximdi xaung numamdi. Isipdi numadingdi bagula dibaxagi mana langudi. Titi xauna bagula dikaukau.
22 “ ‘Ne mana xaidapka baguba bagula ngalibu kubolu xan tela mana titia Gosen, titia ba lipuxigudi dirung mana ba. Langudi bagula ditalia la ba te, bu sanga ba ubagu uxabia ba nga Toxoratamona ngawa mana titia li.
23 Bagula ngahata kubolua ngalibu mana lipuxigudi xaung mana lipuximdi. Buragina bagula xamang haringina li sok.’ ”
24 Baing Toxoratamona libu bila ba. Langu talianga mutungadinggamdi doti dibaxagi mana Pero numang xaitamoxiama xaung mana yanamindi numadingdi. Isip hataing longgalo didoa namua na langudi dibaxagi manadi ba.
25 Baing Pero wagi Moses Aron tang dima saing harua ba, “Ala, ahanania na Urana amia maluxuʼm titia li.”
26 Ning Moses harua ba, “Ala ba (bagula) maring te. Hananiangadi am gahananiadi na Urana amia ba bagula musuding Isipdi maxadingia. Baing nabu am gahanania hananiangadi musuding maxadingia, bagula daxatuam siangia mati!
27 Sanga te. (Bing) am gahaxa xaidap tuwa mala long xoliania ba am gahanania hananiangadi na Toxoratamona Urana amia, bila tabinam ba.”
28 Binabu Pero harua ba, “Sangau. Bagula nganai mana ala ahanania hananiangadi na Toxoratamona Urana angia long xoliania, ning sanga ba ala hasoya buk te. Tauna, axusunga haringina ba ngaxap haulingua hatata!”
29 Moses haxuya ba, “Haxek sibuna ngasauyaung mala, bagula ngaxusunga Toxoratamona haringina, saing buragina langudi bagula disauya Pero xaung yanamindi xaung lipuxindi. Ne xai te nabu Pero tuxu muraga muli mana hauxana ba yunga lipuadi dila dahanania hananiangadi na Toxoratamona.”
30 Baing Moses sauya Pero saing sabu na Toxoratamona.
31 Baing Toxoratamona libu bila Moses xusunga ba. Langudi disauya Pero xaung yanamindi xaung lipuxindi. Langu tela wauyu te.
32 Ning bungina baguba xauna Pero libu toxonoa haring saing hauxana ba yunga lipuadi ba dila.