3
Moses Xaung Xai Kaxukana Yaba Wa Mana Ba
1 Tauna, xaidap tela Moses wasa mana longang morundi, lipua Yetro, Midiandi lipuxiding hananiangama. Baing xai morudi makisi mala long xoliang hataina (lo), saing sok ma Bimbia Horep, Urana bimbianoa.
2 La ba Toxoratamona uleginama owa masok mana maluxuʼm yap manandi liwe mana xai kaxukana. Moses bagu ba heku yaba wa mana xai kaxukana ba, yabua tau te.
3 Binabu Moses harua ba, “Bing ngala yata lo bu bagu axa hixingamga li. Baruta xai kaxukana ba tau te?”
4 Toxoratamona bagu ba kisi mala ba bagu, baing Urana wagi sangua xai kaxukanoa mana ba, “Moses! Moses!”
Baing Moses harua ba, “Ngawau.”
5 Urana harua ba, “Labu uma haxekku(yu) tai. Uhasia xaim sanggandi, namua na longga uli mana ba bing titia ngamogu nanga ba.”
6 Baing harua muli ba, “Nga ba Urana mana tibum, Urana mana mugangamdi Ebraham, Aisak xaung Yekop.” Moses lungu bila ba, baing ina naga, yameng ramramonoa, namua na maxuwa ba bagu Urana.
7 Toxoratamona harua ba, “Ngabagu masup lipuxigudi daxap doa baru mana Isip baing. Ngalungu xabangadinga daxaba namua na lipuxiding haringindi dilibudi dimakasa buk, saing ngausidi sibuna mana salaga daxap.
8 Binabu ngari ma ba ngaxaidi sangua Isipdi rimadingia, saing ngaxapdi mahaing sangua titia ba maluxuʼm titia xai xaung ganangang sabanga. Titia ba orana, baxagi mana su xaung dungungu langina. Hatata adi li dingia: Kenandi, Hitdi, Amordi, Peresdi, Hibdi xaung Yebusdi.
9 Bagu hatata Isreldi xabangadinga sok manga, saing ngabagu Isipdi dilibu doa nadi.
10 Binabu, hatata ula. Ngasoxiaung mala rangua Pero bu oxop lipuxigudi Isreldi mahaing sangua Isip.”
11 Ning Moses harua na Urana ba, “Nga gaxarea (ba) sanga ba ngala rangua Pero xaung ngaxap Isreldi sangua Isip?”
12 Baing Urana harua ba, “Bagula ngawa ranguaung. Xauna, alali bagula wa mogungua ngahatanga naung ba nga ba ngasoxiung ba: Bungina oxop lipudi sangua Isip masup, bagula asabu mana Urana mana bimbia li.”
13 Baing Moses harua na Urana ba, “Nabu ngala rangua lipuadi Isreldi saing ngaharua nadi ba, ‘Urana mana mugangaimdi soxi nga ma ranguang,’ saing duxusunga nga ba, ‘Yanoa baru?’ bing bagula ngahaxuya nadi baru?”
14 Urana harua na Moses ba, “Nga naga Ngawa. Uharua na Isreldi bila li: ‘Ngawa soxi nga ma ranguang.’ ”
15 Urana harua na Moses xauna ba, “Uharua na Isreldi ba, ‘Toxoratamona, Urana mana mugangaimdi—Urana mana Ebraham, Aisak xaung Yekop—soxi nga ma ranguang.’
“Alali yagua bungingbunginalo,
yagua ahatumia muli
sanga mana bakbak taining tainina disok kimu.
16 Ula, saing uwagi Isreldi yanamidingdi digugunia. Ubaladi ba, ‘Toxoratamona, Urana mana mugangaimdi—Urana mana Ebraham Aisak xaung Yekop—owa masok manga. Bala nga ba, “Ngabaguang saing ngabagu kubolua dilibu mang mana Isip.
17 Baing ngahau haruangua ba ngaxapkang sangua salaga axap mana Isip mala maluxuʼm titia hatata Kenandi, Hitdi, Amordi, Peresdi, Hibdi xaung Yebusdi dirung mana ba—titia ba orana, baxagi mana su xaung dungungu langina.’
18 “Isreldi yanamidingdi bagula dilungung. Baing ung gugabu yanamdi bing ala rangua Isip(di) xaitamoxidinga saing aharua na ba, ‘Toxoratamona, Urana mana Hibrudi, gugunia ranguam ba. Am gaxusungaung ba unai mana am gala xaidap tuwa haxangamia mala long xoliania bu am gahanania na Toxoratamona Urana amia.’
19 Ning ngaxabia xai ba Isip(di) xaitamoxidinga bagula nai mana ala olanggu tai. Ne nabu rima haringing sibuna haxi mana, bing bagula nai mana.
20 Binabu bagula nga raria rimaroa saing ngasina salaga na Isipdi xaung axamang haringindi bagula ngalibudi liwe manadi. Sup, baing bagula nai mana ala.
21 “Baing bagula ngalibu Isipdi duxunumia xai lipuxigudi, bu bungina asauya Isip, bagula ala olang te.
22 Haing longgalo bing duxusunga Isipdi numading rubinamdi, xaung Isip gaxarea duwa mana numadingia mana xalaxala silba xaung gol, xaung imangdi. Bing asausau garaim lupdi xaung nanuhangimdi. Bila balau, bagula axap Isipdi xalingidingdi mala olang.