4
Toxoratamona Haringia Moses Ba Hatanga Haringinganoa
1 Baing Moses haxuya ba, “Ne, nabu dahatum haringina manga te, kimbo dilungu haruangagua te, daharua ba ‘Toxoratamona owa masok maung te’, bagula ngaria baru?”
2 Toxoratamona harua na ba, “Ala wa rimamia (ba) baraxinta?”
Haxuya ba, “Tuki(a).”
3 Baing Toxoratamona harua ba, “Uting mari titia.”
Moses ting mari titia saing xugia masok moxua. Baing Moses hixi mala sangua.
4 Baing Toxoratamona harua na ba, “Uraria rimama mala saing utuxu(ti) uxania.” Binabu Moses raria rimanoa saing tuxu(ti) moxua saing xugia masok tuki muli rimania.
5 Toxoratamona bala ba, “Ulibu bila ba, baing bagula dahatum haringina ba Toxoratamona, Urana mana mugangaimdi—Urana mana Ebraham, Aisak xaung Yekop—Ina naga owa masok maung.”
6 Baing Toxoratamona harua ba, “Uta rimama maluxuʼm imangim maxaxaya.” Binabu Moses ta rimanoa maluxuʼm imanging maxaxaya, saing bungina xai masok muli, rimanoa saksaxana, sok usamang sibuna.
7 Baing Toxoratamona harua ba, “Uta maluxuʼm imangima muli.” Binabu Moses ta rimanoa muli maluxuʼm imanginoa, baing bungina xai masok muli, xai muli bila sanggang (hataing) teladi.
8 Baing Toxoratamona harua ba, “Nabu dahatum haringina maung te, kimbo dahatumia axamang haringing mugamugangama te, bola dahatum haringina mana luwa(ma).
9 Ning nabu dahatum haringina mana axamang haringing luwadi ba te, kimbu dilungung te, bing uxu lang tela(di) mana Langga Nail saing umatu mari titi mamasania. Langga oxop ba bagula sok sip titia.”
10 Ne Moses harua na Toxoratamona ba, “O Toxoratamona ngayua, mugau ma, baxangangagua xai te. Hatata xauna, heku uharua rangua nga, suxungugua mauxanauyu. Managua bisa te, saing haruangagua rabang.”
11 Baing Toxoratamona harua na ba, “Gaxarea sina lipudi suxungudingdi? Gaxarea libudi lipu tangalia haxatiandi kimbo lipu mumgutingamdi? Gaxarea libudi dibagu kimbo libudi lipu maxa haxatiandi? Nga naga, Toxoratamona! Maxuna?
12 Binabu ula. Bagula ngahauliung xaung haruangua, saing bagula ngatubatubaung haruanga baruamta bagula uharua ba.”
13 Ne Moses harua ba, “O Toxoratamona ngayua, ngaxusungaung ba, usoxi lipu tela mala!”
14 Baing Toxoratamona atindi disala mana Moses, saing harua ba, “Sabangama Aron wa, a? Libai tela. Ngaxabia ba sanga ba harua xai. Bagu (sok) ma bu guguniaung, saing bungina bagung, bagula gamona yaha sibuna.
15 Bagula uharua na saing ubala haruanga baruamtadi ba harua, saing bagula ngahauliangtang xaung haruangua, saing bagula ngatubatubangtang ba tang galibu baru.
16 Bagula harua na lipuadi maung, saing bagula wa lipuxim suxunguxunguama, saing bagula uwa bila Urana maxania.
17 Ning oxop tuki li wa rimamia mala bu sanga ba ulibu axamang haringinadi mana.
Moses Goxoya Mala Mana Isip
18 Baing Moses goxoya mala (muli) rangua longanoa Yetro saing harua na ba, “Ngaxusungaung ba unai mana ngagoxoya mala rangua nga sibugu bakbagigudi duwa Isip bu ngabagu nabu teladi duwauyu.”
Yetro harua ba, “Sangau, ula. Gamoma wa mosiu.”
19 Muga bungina Moses wauyu Midian, Toxoratamona harua na ba, “Ugoxoya mala Isip muli, namua na adi dibo ba dunggung mati, ding dimati (masup) (ba).”
20 Binabu Moses xap haininoa garandi, tadi mahaing mana donki, saing dahaxa malau mana Isip. Baing Moses xap tukia mana Urana mala rimania.
21 Baing Toxoratamona harua na Moses ba, “Bungina usok mana Isip, bing ulibu axamang haringinadi ngasina haringinga naung mana ba Pero maxania. Ne bagula ngalibu toxonoa haring bu bagula hauxana ba yunga lipuadi dila.
22 Saking uharua na Pero ba, ‘Toxoratamona harua bila li: Isrel matuaugu,
23 saing ngabalaung ba, “Uyunga garagu (lup) ba ila, bu sanga ba sabu manga.” Nabu hauxama mana uyunga ba ila, umaxania to, bagula ngaung matuauma baing!’ ”
24 Dahaxa mala, baing mana tabalaxaya tela lia, Toxoratamona sok mana Moses saing bo ba ung matiuba.
25 Ning Moses haininoa Sipora xap waxang sianggam tela, xuxuti garang luba sangganoa saing ta sangga ba mana Moses kindi, saing harua ba, “Maxuna mana kubolua li siba ri, hatata usok bakbagigu (tela) yaungia.”
26 Binabu Toxoratamona sup mana hatuminganoa. (Bungina Sipora harua ba, “mana kubolua li siba ri,” harua mana xuxu sangganoa.)
27 Baing Toxoratamona harua na Aron ba, “Usok mala long xoliania bu ugugunia Moses.” Binabu ila gugunia Moses Urana bimbiania, saing libu (manggobinia).
28 Baing Moses baxanga na Aron axamang longgalo Toxoratamona soxi mala bu harua, xaung axamang haringinadi tabina ba libudi.
29 Moses Aron tang dila digugunia Isreldi yanamiding longgalo dima.
30 Aron baxanga nadi haruanga longgalo Toxoratamona baxanga na Moses saing libu axamang haringin(a)di lipudi maxadingia.
31 Baing dahatum haringina. Baing bungina dilungu ba Toxoratamona usidi sibuna saing bagu daxap doa baru, dituru mari titia saing disabu mana.