5
Sivarai heḡereḡerena: vine imeana
1 Ane ta baina abia, egu lalokau tauna ena,
lalokau anena, ena vine imeana dainai:
Egu lalokau tauna na mai ena vine imeana ta,
ororo ai, tano namona ai.
2 E ruaia, nadi e negedia,
bena vine namo-hereadia e hado;
bogaraginai gima patana e haginia,
bona nadi e taraia guriguri, vine itaolaidia.
Bena ia banava eto vine huahuadia bae dobi,
to uda vinedia huahuadia hetomadia mo e dobi.
3 Ierusalem inoholaina taumui e,
Iuda taumui e,
Lau na noimuimu, lau bona egu vine imeana
ba gwauraimai hidi, edena be namo.
4 Dahaka bama karaia egu vine imeana enai,
bena asina karaia?
Lau banava nato vine huahuadia bae dobi,
to dahaka dainai uda vinedia huahuadia hetomadia mo e dobi?
5 A harihari aina hamaoromui,
egu vine imeana ede baina ḡaukaralaia toma:
Arana baina raḡaia,
bena lahi ai bae doua;
maḡuna baina ḡiḡia dobi,
bena bae moimoilaia;
6 baina havahua,
vine rigidia basie kwamadia bona ava basie rau,
ava ḡiniḡini bona au ginigini na bae tubu;
dagadaga danu baina haḡanidia,
medu basie hadihoa ia latanai.
7 Badina be Iehova Sabaota ena vine imeana
na Israel besena,
bona Iuda taudia na
ena uhe namodia;
ia ese hahemaoro ḡoevaḡoeva e tahua,
a ḡau be rara hebubu mo;
kara maoromaoro e tahua,
a ḡau be taitai mo.
Kara dika taudia, ihabaidia!
8 Ruma ta ruma ta ida
bona uma ta uma ta ida e haboudia taudia,
madi, ihabaidia!
Umui na asi emui noho gabuna ta,
tano bogaraginai vada e hanohomui edea dainai.
9 Iehova Sabaota ena gwauhamata na kamonai, eto:
Ruma momo bae mia ḡaḡae,
ruma namodia, mai hairaidia, to asi inoholaidia taudia.
10 Badina be vine imeana dina tamona ena herua tanona
anina na bata tamona bae haboua,
bona uhe nadinadidia homere ta amo
aniani efa tamona bae abia.
11 Unu daba maraḡi ai e tore isimu
kekero ḡaudia bae tahu totona,
bena e halahemu ela bona hanuaboi ai
vine ranuna ese e hakekerodiamu taudia,
madi, ihabaidia!
12 Edia aria ai idia na mai edia hatai-hatai ḡaudia maraḡidia bona badadia,
bona edia tareko bona ivilikou bona vine ranuna danu;
to idia ese Iehova ena kara asie lalodiamu,
bona imana ai e kara ḡaudia asie itadiamu.
13 Taunabunai egu bese taudia na dauhai e hanohodiamu,
asi edia lalo-parara dainai;
e matauradiamu taudia na e hitolodia masemu,
bona edia taunimanima hutuma na e ranu masemu.
14 Una dainai Mase Gabuna e gadomu,
bona uduna e haḡaia badabadamu;
Ierusalem lohiadia bona ena taunimanima hutuma na e diho e laomu,
ena hegogo taudia bona ia e heaḡilaiamu tauna danu.
15 Taunimanima na e ha-igodia dihomu, e atodia dobimu;
heaḡi taudia matadia e harohadia tarimu.
16 A Iehova Sabaota na hahemaoro ḡoevaḡoeva ai e imodaiamu,
bona Helaḡa Diravana ese ena helaḡa na kara maoromaoro ai e hahedinaraiamu.
17 Bena mamoe natudia na bae aniani, edia rei gabudia ai bema aniani na heto;
ubu-ubu ḡaudia bona nani natudia na ruma ahutudia ai bae aniani.
18 Kara havara na koikoi varodia amo e veriamu,
bona kara dika e veriamu, rerue kwanaudia amo bema veria na heto taudia,
madi, ihabaidia!
19 Idia na e tomu: Baine kara haraḡa,
ena ḡaukara baine haheaua,
baia itaia helaoreana;
Israel ena Helaḡa Diravana ena lalo-hadai baine kahikahi mai,
bainema, baia dibaia helaoreana.
20 Unu dika e gwauraiamu namo bona namo e gwauraiamu dika taudia,
unu dibura na diari ai bona diari na dibura ai e halaomu taudia,
unu idita na e hagaihoa bona gaiho na e ha-iditaia taudia,
madi, ihabaidia!
21 Unu sibodia matadia ai mai aonegadia e tomu
bona sibodia vairadiai mai dibadia momo e tomu taudia,
madi, ihabaidia!
22 Unu mai haridia vine ranuna i'inuna ai,
bona mai boga-aukadia kekero ḡaudia ibulodia ai taudia,
madi, ihabaidia!
23 Unu henitao koikoi dainai kerere tauna maorona e gwauraiamu
bona asi ena kerere tauna igwaurai-maorona se uramu taudia,
madi, ihabaidia!
24 Taunabunai, vada e utu reidia badidia lahi ese vada e aradia,
bona rei kakoro na lahi hururudia ai e ara oremu na heto,
idia ramudia unu bae houka-houka toma,
bona buredia bae heoda isi kahu na heto;
badina be idia ese Iehova Sabaota ena taravatu vada e negea,
bona Israel ena Helaga Diravana ena hereva vada e dadaraia.
25 Taunabunai Iehova ena badu e ḡaraḡara, ena bese taudia latadia
bena ia imana e toi roro henidia, e rahudia mase,
bona ororo na e heude-heude;
bena tau-anidia masedia na momoru na heto,
ariara bogaragidiai.
Ḡau tamona, ena badu na do se heabi oho,
bona imana na doini e hetoi roromu.
26 Toa na dauhai e nohomu besena baine henia,
bona tanobada dokodia amo baine hioga henia.
A itaia, e mai haraḡa-haraḡamu.
27 Ta tauna se boeramu, ta se hetutuhimu,
ta matana se hakapumu eiava se mahutamu,
ta ramina se heruhamu,
tamaka varona ta se motumu;
28 edia diba na mamataka-mamataka,
edia peva iboudiai e marediamu,
edia hosi aedia na nadi-vasiga na heto,
edia ava-keikei na koe-hirihiri na heto;
29 edia ḡou na leona e ḡoumu na heto,
leona natudia na heheto e ḡoumu,
e ḡiḡimu, damudia e korimu,
e laohaimu, ta basine hamauridia diba.
30 Una dina ai bae heḡaralaia,
davara hurehuredia reḡedia na heheto.
Ta ese tanobada bema haḡerea,
dibura bona hisihisi mo bema ita davari;
bona ia dagadagana ese diari e hadiburaiamu.