8
Iesu Pipiya 4,000 i Kanisi
Kona maranai koroto kaikapona yebo si notuwa, ba kosi kega kesana awaika sita kani kairavina, Iesu ana nonorayauna i yorisi si botu kurina ba i wona, “Nikosi pipiya a binuwapoyisi, kairavina yabata ka mana kao ba pom tonu si kakaba ba kega kesana awaika si kani. Ba memei bage ani poraisi asi ku yove wai, keta dobonai sina bomesumesu ba sina peku kairavina mutusi wai rabarabai si botu.”
Saba ana nonorayauna si kaobeyei si wona, “Niko kupura momna, ba memei kam tana yauni wai tani kanisi?”
Ba Iesu i toiruba, “Komi bread biyamo wata karimi yai?”
Ba si kaobeyei si wona, “Asi 7.”
Kata koroto i wonisi tano ai si makira ba bread asi 7 i yauni, ba i kaikaiwa ba i botomni ba ana nonorayauna i berisi kata pipiya si berisi, ba nanakasike si wosei. Yebo kosi gwabisi yai iyana soesoesi ruwamo si mamana wai i yauna ba kairavisi i kaikaiwa, ba ana nonorayauna i wonisi kata pipiya sita berisi. Ba pipiya si kam ba si kam siyabagi murinai, ana nonorayauna pipiya si kam taura wai poga asi 7 si bonuvisi. Ba sebasebare wata nanakasike 4,000 asi rakaraka yabata si notuwa, ba i pora taveyisi murinai, 10 ana nonorayauna yabata si sugae ku waka ba si nae ku Dalmanutha kupurina mena.
Pharisee Biyisi Matakira Kairavina si Baba
(Mat 12:38,39, 16:1-4; Luk 11:29-32)
11 Pharisee biyisi si botu ba si dagui Iesu si bikasekasemainisi raurubai kata matakira sapamai ita wosei sita kitai.* 12 Ba kona yana ita geyei ba i wona, “Awaika kairavina karaku pipiyisi matakira kairavina te bibaba? A bisuwonimi kega kesana abi matakira ana berisi.”
13 Damanina ba i sumarisi, i sugae ku waka ba i garubona ku sepina mena.
Pharisee Biyisi ba Herod asi Yeast
(Mat 16:5-12)
14 Ba ana nonorayauna bread sita yauni wai si nota wapei, saba karisi yai kesanaikei wata waka kamonai i mamana. 15 Saba Iesu i kaotuneisi, “Ko kinana kabitamnimi Pharisees biyisi ba Herod asi bibeyebeyena nanakasike bage yeast ina nunui.”*
16 Ba nikona kosi wata si dimeyanei ba si wona, “Kota bread kega ta yauna kairavina nikasike i sisiya.”
17 Iesu asi bidimeyana i kuiri, wai i toirubaisi, “Awaika kairavina bread kega ko yauna wai ko bisisiyei? Komi ko kinakinani ba ko kuikuiri kona kega? Komi karauwata nuwanuwami padapadasi? 18 Komi matami e mamana ba kega ko kinakinani kona? Ba tainami e mamana ba kega ko nonora kona? Ba ko notanota panani kona kega?* 19 Maranai pipiya 5,000 kairavisi bread asi 5 a botomnisi ba si kam botaura wai poga biyamo koi bonuwisi?”
Si kaobeyei si wona, “Asi 12.”
20 “Ba pipiya 4,000 kairavisi bread asi 7 a botomni maranai si kam botaura wai, poga biyamo si bonuwa, ko yauna?”
Ba kosi si wona, “Poga asi 7.”
21 Ba kurisi i wona, “Mekabage wai komi karaku wata ko biburuburuwei.”
Sebare Mata Potapotana i Yawasi
22 Kosi si botu ku Bethsaida, ba sebare mata potapotana kesana si botuwei, ba Iesu si babai kata ita borubai. 23 Ba Iesu sebarena yarona i yauni ba i naovei meyaga si kasibau taveyei. Ba sebarena matana i kanui murinai ba i borubai, ba i toirubai, “Kom kesana awaika ke kitakitai kona?”
24 Sebarena i gagawa ba i wona, “Eee! Pipiya a kinakinanisi saba nakasike bage keyama sita yewoyewo neubuwa.”
25 Iesu yarona i terei meyei sebare ku matana, ba matana i tamotatara ba i kinana kabitam wai sawara ereonowana i kinana. 26 Damanina ba Iesu i porai ana ku yove ba i wonei, “Kega kuna riu ku meyaga.”
Peter Iesu i Debei
(Mat 16:13-20; Luk 9:18-21)
27 Iesu ana nonorayauna yabata si nae ku Caesarea meyagisi, Philippi kupurinai ba keta dobonai i toirubaisi i wona, “Pipiya te wonawona yauku wai kotoi?”
28 Ba kosi si kaobeyei si wona, “Pipiya mutusi te wonawona kom John Babataito biyina, ba mutusi si wona Elijah, ba yebo mutusi te wonawona kom peroveta kesana.”*
29 Ba ana nonorayauna i toirubaisi i wona, “Komi mekabage ko wonawona, yauku kotoi?”
Ba Peter i kaobeyei, “Kom wai Keriso.”*
30 Ba Iesu i kaotunetuneisi i wona, kega kesana kotoi kona wonei kata yauku kotoi.
Iesu ana Rabobo i Kaogubei
(Mat 16:21-28; Luk 9:22-24)
31 Damanina ba Iesu ana nonorayauna i dagui i bibeyebeyisi kata Sebare Natuna wose pesarisi ina paiwara. Ba Jew babadisi, priest kaiwabosi, giugiu biyisi sini sinikikiyei ba sina kasibunui ba kao tonu murinai ina bomsiri mena. 32 Nikona kurisi i sisiyana kabitamni ba Peter Iesu i taina sirei ku parina ba i dagui i kaorumatani, “Kega nikasike kuni sisiya.”
33 Saba Iesu i rusinimura ana nonorayauna i kinanisi ba Peter i kaorumatani i wona, “Satan ku muriku ke nae! Kom am nota kega God karinai te botubotu saba pipiya karisi yai.”
34 Damanina pipiya korotosi ba ana nonorayauna yabata i yorisi si botu kurina ba i wonisi, “Kom kotoi wata am waina kuni sununuriku wai ikesim ke kaotaveyim, ba am korosi ke kabari ba ki sununuriku.* 35 Kotoi wata ana waina ikesina ana yawasa ina botawani wai ini siwani, saba kotoi wata yauku ba Wara Gairena kairavina ana yawasa ini siwani wai, ina yawasa.* 36 Maranai sebare dobu tupana ina yoyoi ba pipiyina ina siwani wai awaika gairena ina panani? 37 Kona, kega kesana awaikai ana yawasa ini gimonei. 38 Saba niko rukaipara ba piragagoyo kimtina asi marai kotoi wata yauku ba wonaku ini sinimayei wai, Sebare Natuna tamana ana kadarai, aneya kaobaisiyesi yabata sina botu wai ini sinimayei.”
* 8:11 Luke 11:16 * 8:15 Luke 12:1 * 8:18 Mark 4:12 * 8:28 Mark 6:14,15; Luke 9:7,8 * 8:29 John 6:69 * 8:34 Matthew 10:38; Luke 14:27 * 8:35 Matthew 10:39; Luke 17:33; John 12:25