8
N siwatl non okajsito iwan ok se tlakatl
Jesús oyá kan olivostepetl. Ijkuak owaltláneski, oksepa oyá kan Weyi Tiopa. Omijkuanijkeh inawak, iwa Ye omotlali iwa opé kinmachtia. Ijkuak Jesús otlamachtijtoka, n tlamachtijkeh de itlanawatil Moisés iwa n fariseos okualikilijkeh se siwatl non okajsitoh iwan ok se tlakatl non amo iokich itech tlajtlákoli. Yejwah okiketsatoh tlatlajkotiah, iwa okilijkeh n Jesús:
—Tlamachti, nin siwatl otikajsitoh itech tlajtlákoli. Itlanawatil Moisés tlanawatia matikinmiktikah ika tetl akimeh ijkó kichiwah.* Tejwatsi, ¿tlan tikijtoa?
Yejwah ijkó okilijkeh para kitaskeh tlan kichiwas, iwa ijkó kipiaskeh tlan ika kiteiliskeh. Ijkuakó Jesús omotolo iwa opé tlajkuiloa ixko tlali ika imajpil. Pero kemi okachi okitlatlajtlaniayah, Ye omoyékketski iwa okijto:
—Tla aka de nomejwah amo kipia tlajtlákoli, ye achto makimotla ika tetl.
Jesús oksepa omotolo iwa ok otlajkuilo ixko tlali. Keman okikakeh tlan Jesús okinmili, se por se oyayajtiajkeh. Achto oyayajkeh non okachi ya wewemeh, iwa ijkuak nochteh yoyayajkeh, sa Jesús omoka iselti iwan siwatl. 10 Ijkuakó, Jesús omoyékketski iwa kemi ayakmaka okitak, okitlajtlani n siwatl:
—Siwatl, ¿kanin kateh non omitsteiliayah? ¿Amaka omitstlajtlakolti?
11 N siwatl okili:
—Nion se de yejwah Noteko.
Ijkuakó Jesús okili:
—Nion Ne omitstlajtdlakolti. Xio, iwa ayakmó oksepa xitlajtlakolchiwa.
Jesús Ye n tláwili itech nin tlaltíkpaktli
12 Jesús oksepa okintlapowi iwa okinmili:
—Ne nitláwili itech nin tlaltíkpaktli. Akin wits nonawak, kipias n tláwili non kimakas nemílistli iwa ayik nemis kan tleyua.
13 N fariseos okilijkeh:
—San Te monewia timotenewa akin te, yika, tlan tikijtoa mach itla ipati.
14 Jesús okinnankili:
—Maya Ne nonewia nimotenewa Akin Ne, tlan nomechilia milák, porke Ne nikmatok kan oniwalewak iwa kan nio. Pero nomejwah amo nonkimatih kan oniwalewak nion kan nio. 15 Nomejwah nontetlajtlakoltiah kemi kichiwah n tlaltikpaktlakah. Ne amaka niktlajtlakoltia. 16 Pero tla Ne nitetlajtlakoltia, nikchiwa ika tlan milák, porke amo san Ne noselti nitetlajtlakoltia, yej Ne iwan Notajtsi Dios akin onechaltítlanki. 17 Itech nomotlanawatil ijkuilitok, sanwel kiseliskeh intlajtol ome iwa amo san se. 18 San Ne nonewia nimotenewa akin Ne, iwa Notajtsi Dios Akin onechaltítlanki, noiwa nechteixmatiltia akin Ne.
19 Yejwah okitlajtlanijkeh:
—¿Kanin kajki Mota?
Jesús okinnankili:
—Nomejwah amo nonnechixmatih, nion nonkixmatih Notajtsi, tla nomejwah nonnechixmatiskiah, noiwa nonkixmatiskiah Notajtsi.
20 Ninteh tlájtolteh Jesús okimijto ijkuak otlamachtijtoka itech n Weyi Tiopa kan ik okatka n kaxajtomij. Pero amaka okikitski porke ayamó oajsia n tonati para kikitskiskeh.
‘Kan Ne nias nomejwah amo weletis nonyaskeh’
21 Jesús oksepa okinmili:
—Ne nias, iwa nonnechtemoskeh, pero nonmikiskeh itech nomotlajtlakolwah. Yika, kan Ne nias, amo weletis nonyaskeh.
22 Ijkuakó n tlayakankeh judíojteh okijtojkeh:
—¿Chamo kineki momiktis, yika kijtoa kan Ye yas, tejwah mach weletis tiaskeh?
23 Ijkuakó Jesús okinmili:
—Nomejwah nonteaxkawah itech nin tlaltíkpaktli, pero Ne niwalewatok de ilwikak. Nomejwah non tlaltikpaktlakah, pero Ne amó. 24 Yika onomechili nonmikiskeh itech nomotlajtlakolwah. Porke tla nomejwah amo nonnechneltokah kox Ne Ni Cristo, nonmikiskeh itech nomotlajtlakolwah.
25 Ijkuakó oksepa okitlajtlanijkeh:
—¿Akin te?
Jesús okinnankili:
—Ne yonomechili Akin Ne. 26 Nikpia miak tlájtoli tlan nomechilis iwa miak tlan ika nomechtlajtlakoltis, pero Akin onechaltítlanki kijtoa tlan milák, iwa tlan Ne nikinmilia n tlaltikpaktlakah ye tlan onikkak, okijto.
27 Yejwah amo okajsikamatkeh Jesús okintlapowiaya de Itajtsi Dios. 28 Yika Jesús okinmili:
—Ijkuak nonnechajkokuiskeh, Ne non onimochi ni tlakatl, ijkuakó nonkajsikamatiskeh Ne Ni Cristo, iwa amitla nikchiwa san tlan Ne nikneki. Ne sanwel nikijtoa tlan Notajtsi Dios onechmachti. 29 Porke Akin onechaltítlanki kajki nowa. Amo kema nechkawa noselti, porke nochipa nikchiwa tlan Ye kipaktia.
30 Ijkuak Jesús ijkó okinmili miakeh okineltokakeh.
Jesús kinmilia kenomi se makisas itech tlajtlákoli
31 Ijkuakó Jesús okinmili n judíojteh non okineltokakeh:
—Tla nomejwah nochipa nonkitlakitaskeh notlajtol, milák nonyetoskeh notlamachtijkawah. 32 Iwa nonkixmatiskeh tlan milák, iwa tlan milák nomechmakixtis.
33 Yejwah okinankilijkeh:
—Tejwah tiwalewatokeh de Abraham, iwa ayik otikatkah titlanemakteh, ¿kenijki Te tikijtoa techmakixtis?
34 Jesús okinankili:
—De milajka, de milajka nomechilia, nochteh akimeh kichiwa tlajtlákoli kijtosneki n tlajtlákoli kinnawatijtok kemi se tekowa. 35 Se esklavo amo nochipa mokawas ichan iteko. Pero se tekone nochipa yetos mowa. 36 Ijkó kiné, tla Ikone Dios nomechmakixtis, nomejwah de milajka nonmomakixtiskeh. 37 Kuali nikmatok nomejwah nonwalewatokeh de Abraham. Pero nonkinekih nonnechmiktiskeh porke amo nonkiseliah notlajtol itech nomoyolo. 38 Tlan onikitak inawak Notajtsi, ye nikijtoa. Iwa nomejwah tlan ononkikakeh de nomota nonkichiwah.
39 Yejwah okilijkeh:
—¡Tejwah titepilwah de Abraham!
Jesús okinmili:
—Tla de milajka nonyetoskiah ipilwah Abraham, nonkichiwaskiah tlan Ye okichi. 40 Pero maya yonomechili tlan milák, tlan Dios onechititi, nomejwah nonkinekih nonnechmiktiskeh. ¡Abraham ayik ijkó okichi! 41 Nomejwah nonkichiwah tlan kichiwa nomota.
Yejwah okinankilijkeh:
—Tejwah amo tiichtakakokoneh, sanwel se totata tikpiah, iwa Ye Dios.
42 Jesús okinnankili:
—Tla de milajka Dios yaskia Nomotajtsi, nomejwah nonnechtlasojtlaskiah, porke Ne oniwala de Dios itech nin tlaltíkpaktli. Amo oniwala san por Ne oniknek, yej Dios onechaltítlanki. 43 ¿Tleka amo nonweletih nonkajsikamatih tlan nomechilia? Porke amo nonkinekih nonkiseliskeh notlajtol. 44 Nomejwah nomota n diablo, nomejwah ipilwah, iwa nonkichiwah tlan ye kiwelita. N diablo ye se temikti desde ipewaya n tlaltíkpaktli iwa ayik kijtoa tlan milák. Porke ye amo kixmati tlan milák, iwa ijkuak tlajtoa, tlakajkayawa porke ye non iteki. Iwa ye n teta de nochteh non tlakajkayawah. 45 Pero kemi Ne nikijtoa tlan milák, yika nomejwah mach nonnechneltokah. 46 ¿Akin de nomejwah weletis kijtos ke nikpia itla tlajtlákoli? Iwa tla Ne nikijtoa tlan milák, ¿tleka amo nonnechneltokah? 47 Akimeh tepilwah de Dios, kikakih itlajtol Dios. Pero kemi nomejwah amo nontepilwah de Dios, mach nonnechkakih.
Ijkuak Abraham otlákatki Cristo yokatka
48 Ijkuakó n tlayakankeh judíojteh okilijkeh:
—Yompa tlan tejwah tikijtoah, te de Samaria iwa tikpixtok se amokuali espíritu.
49 Jesús okinnankili:
—Ne amo nikpia se demonio. Ne sanwel nikweyilia Notajtsi, pero nomejwah nonnechmawistetepewah. 50 Ne mach niktemoa manechweyilikah. Pero onka se Akin kimonekiltia manechweyilikah, iwa Ye Akin teixkomakah. 51 De milajka, de milajka nomechilia, akin kitlakita notlajtol, ayik mikis.
52 Ijkuakó n tlayakankeh judíojteh okinankilijkeh:
—Axa kuali tikmatih te tikpia se demonio. Abraham iwa nochteh n profetas omikkeh, iwa te tikijtoa: “akin kitlakita notlajtol, ayik mikis.” 53 ¿Mach te okachi tiweyijkatitok ke Totata Abraham? Ye noiwa omikki iwa n profetas noiwa. ¿Akin te timomachilia?
54 Jesús okinnankili:
—Tla san Ne nimoweyijkachiwa, noweyijkachiwalis amitla ipati. Pero Akin nechweyijkachiwa, Ye Notajtsi, Akin nomejwah nonkijtoah Nomodios. 55 Pero nomejwah mach nonkixmatih. Ne de milajka nikixmati, iwa tla nikijtoskia amo nikixmati, nixolopijtiskia kemi nomejwah. Pero Ne kema nikixmati, iwa nikchiwa tlan Ye nechnawatia. 56 Nomotata Abraham, opaki ijkuak okima niwalaskia, iwa ika itlaneltokalis onechitak iwa opakmik.
57 Ijkuakó n tlayakankeh judíojteh okilijkeh n Jesús:
—Ayamó tikpia ome póali iwa n májtlaktli xiwitl, ¿iwa tikijtoa otikitak Abraham?
58 Jesús okinnankili:
—De milajka, de milajka nomechilia: ¡Ijkuak Abraham ayamó otlakatia, Ne yonikatka!
59 Ijkuakó yejwah okinmonankeh temeh para kimojmotlaskeh n Jesús. Pero Ye okinmotlaatili, iwa opanok intlajkotiah, iwa okiski de kan Weyi Tiopa.
* 8:5 Itlanawatil Moisés tlanawatia matikinmiktikah ika tetl san ken ome akimeh ijkó kichiwah, iwa amo san siwatl. Lv. 20:10.