10
1 O Musengwa, lwahiina otuli ŋaleeŋi?
Lwahiina otwehweha ni huli mu bigosi?
2 Omuhosi wʼebibi abona ati njʼahihenaho era abahiyaania abagadi,
era abaŋambihisya mu mitego jije eji abatega.
3 Ahola ebibi gepaaha olwʼebikolwa bibye ebibi,
gapaaha abanyagulula ebyʼabahyawe era atala Musengwa.
4 Olwʼohwepaahapaaha hwʼomuhosi wʼebibi oyo,
saafayo humanya Musengwa
era samuŋa hifo mu bulamu wuwe.
5 Abitaamo mu hiisi ehi ahola.
Aye samanyire ati ohumusalira omusango humuhuumiriiye,
anyooma abalabe babe.
6 Omuhosi wʼebibi geromaho omwene ati,
“Ŋaŋuma ehija hukaya ohuhola era ŋaŋuma higosi.”
7 Omunwa gugwe gujofumula hujofumula ebiŋwabo,
nʼobudulingi nʼohutiisatiisa,
mwangu ohuloma ebibi hu bahye.
8 Geteega mwisugu nʼahuumirira ohwita abaatu abamuŋumaho musango.
Era hiisi hiseera gendula abaŋumaho songa.
9 Ali hyʼepologoma eyeteega,
geteega ohuŋamba abaŋuma punga yiita hiswa ngʼabadyedyesa mu lutuula lulwe.
10 Olwʼamaani gage, abbwagabbwaga abatasobola hwesoolaho.
11 Aloma mu mwoyo gugwe ati,
“Hatonda saafayo, alimbiriiye era saaja hutubona.”
12 O Musengwa, yinyoha!
O Hatonda, leha babonaabone.
Otebirira abo ababanyigirisa.
13 Lwahiina omuhosi wʼebibi anyooma Hatonda?
Lwahiina aloma mu mwoyo gugwe ati, “Saaja huvunaana.”
14 Aye ewe Hatonda obona
ohubonaabona nʼohulira hwange,
era hiisi hiseera oliŋo ohunjeeda.
Abaŋuma aŋa bali, bahweŋaaye ndiiwe oyeeda abafuubbi.
15 Bbwagabbwaga amaani gʼomuhosi wʼebibi
mulome genyonyoleho olwʼebibi bibye,
omuvunaane olwʼebikolwa bibye ebibi.
16 Musengwa nje Habaha owʼemirembe nʼemirembe.
Abo abajumirya abahatonda abandi baja husihiiriha baŋwe hu hyalo hihye.
17 O Musengwa, oŋulira ohwegomba hwʼabaatu babo ababonaabona,
obagobosamo amaani era oŋulira ohulira hwawe.
18 Oŋulira ohulira hwʼabo aba banyigirisa ko nʼabafuubbi.
Oja hubayeeda bahire omusango,
ko abaatu balehere aŋo ohubeŋendeheresa.