9
Yʼomutangirisi wʼabembi. Nʼohutiinira hu janjaasi lya “Ohufa hwʼomusaani.” Ezabbuli ya Dawudi.
1 O Musengwa, nahujumiryenga nʼomwoyo gwange gwosigwosi
era nja hulomeranga abaatu ebiŋamba hu biitu ebyeŋunjisa ebi ohola.
2 Nja husangaala era saŋalye olwʼewe,
nja hwemba ni kujumirya, ewe Ali Ŋamugulu Obugali.
3 Abalabe bange bagobolayo hinyumanyuma,
batagala era basihiirihira mu moni jijo.
4 Hiri hiityo olwohuba osalire omusango nʼotehubbira nasinga,
wihaaye hu tebe yiyo eyʼobuŋugi wasala emisango nʼotehubbira.
5 Osaliiye amawanga omusango
era wasihiirisa abahosi bʼebibi,
wasangula nʼamasiina gaawe gaŋweraŋo erala hu hyalo emirembe nʼemirembe.
6 Abalabe beefe baŋwereyeŋo erala emirembe nʼemirembe.
Osihiirihise ebibuga byawe era ŋaŋume aja hubahebulira.
7 Musengwa aŋuga emirembe nʼemirembe,
atayeeŋo etebe yiye eyʼobuŋugi ohusaliraho emisango.
8 Aja husalira ehyalo hino emisango nʼatehubbira,
aja huŋuga abaatu mu mazima.
9 Aba banyigirisa beŋogoma mu Musengwa,
ehifo ehyʼohweŋogomamo mu biseera ebigosi.
10 Abahumanyire baja huhwesiga.
Hiri hiityo olwohuba Musengwa siwibirira abo abahwendula.
11 Mwembe ni mujumirya Musengwa,
oyo aŋugira mu Sayuuni,
mulomere abaatu bosibosi ebi ahola.
12 Hiri hiityo olwohuba Hatonda ahebulira abo ababonaabona,
sigebirira hulira hwawe
era aja huboneresa abo ababagudya.
13 Pambire ehisa, O Musengwa!
Bona engeri eyi abalabe bange bakiyaaniamo!
Pambire ehisa wuponie ohufa.
14 Pambire ehisa nahalangirira etendo liryo eyiri abaatu abomu Sayuuni,
sangaale olwohuba wunoŋooye.
15 Abahosi bʼebibi baguuye mwiroŋo eri beene baayaba,
baguuye mu mutego ogu beene baatega.
16 Musengwa bamumanyire olwʼohusala emisango nʼatehubbira
aye abahosi bʼebibi babaŋambihisya mu hubbenga hwawe ohwene.
17 Abahosi bʼebibi bosibosi baja hufa,
abaatu bosibosi abatajumirya Hatonda.
18 Aye Hatonda saaja hwibirira abagadi
era esuubi lyawe sirija hufiiririra emirembe nʼemirembe.
19 O Musengwa, yinyoha otaganya muutu huŋunuha musango.
Leha baaje eyi oli obasalire omusango.
20 O Musengwa, bateetemye bahahutya.
Leha bamanye baati baatu buutu.