122
Olwembo nʼotiina e Yerusaalemu. Olwembo lwa Dawudi.
1 Nasangaala olu bandoma baati,
“Nja hutiine mu nyumba ya Musengwa.”
2 O Yerusaalemu hatyane huli ŋano,
hwemereeye mu miryango jijo.
3 Yerusaalemu hibuga ehi batongola ni behoota,
eŋuma aŋanga ohuhijagiija.
4 Era eyo peyi biha bya Yisirayiri bitiina
ohujumirya Musengwa ngʼolu egambi lirye libalagira.
5 Mu hibuga ehyo pomuli etebe ya Dawudi eyʼobuŋugi
ohu beehala basala emisango.
6 Sabira Yerusaalemu ohubaamo emiyaaya
ti, “Abo abahwenda babe bulaŋi.
7 Ha emiyaaya jibe mu bisenge bibyo,
obuhuumi mu lubiri lulwo.”
8 Olwʼabalebe nʼabameeri bange
nja huloma Yerusaalemu ti, “Emiyaaya jibe mu ewe!”
9 Olwʼenyumba ya Musengwa Hatonda weefe,
kusabira ohulahulane.