16
Ezabbuli ya Dawudi.
1 Kusunga wukuume, O Hatonda,
olwohuba ndiiwe oyu nesiga.
2 Naloma Musengwa ti,
“Ndiiwe Musengwa wange,
ebiraŋi byosibyosi ebi ndi ni nabyo ewe ndiiwe obiipa.”
3 Abagwalaafu babo abali mu hyalo hino,
njʼabeŋono abanesiimisa ohuba ni nabo.
4 Abo abajumirya abahatonda abandi
baja hweyongera ohubonaabona bugali.
Sinja hwegaata ni nabo mu huŋonga hwawe
era sinja hujumirya bahatonda baawe.
5 O Musengwa, ewe ndiiwe owange.
Ndiiwe owuupa ebi ndi ni nabyo.
Obulamu wange, buli mu mihono jijo era ŋaŋuma ehi tya.
6 Eroba eri waapa eraŋi bugali,
era mu butuufu oweene, omugabo ogwobusika wange mulaŋi.
7 Nja hwebasanga Musengwa owutangirira,
era owiire omwoyo gwange gundabula.
8 Manyire ti Musengwa ali ni neese habuhyabuhya
era olwohuba ali ni neese, sinja hweŋendeherera.
9 Cʼehigira omwoyo gwange gusaŋalya, nʼolulimi lwange lusangaafu
era mbula ehiitiisa mu bulamu wange.
10 Solireha mwoyo gwange ohusigala e magombe
era solireha Omwawufu wuwo ohubolerayo.
11 Wundaga engira eyipira mu bulamu.
Ohuba huupi ni neese, hiipa esangaalo.
Ohuba hu muhono gugwo omulungi
hiipa esangaalo eryʼemirembe nʼemirembe.