17
Ohusaba hwa Dawudi.
1 O Musengwa, ŋulira ohweŋosyaho hwange ohwʼamazima.
Ŋulira ohusaba hwange, sihwabudulingi.
2 Ndiiwe osobola ohusala omusango nejeerera,
olwohuba omanyire abahola ebiraŋi.
3 Nʼoluwehebeja omwoyo gwange,
era owiire wendulirisa ebigulimo,
nʼoluwungezesa, sooja husaŋaanamo hibi.
Neeyama ohutaloma ehibi.
4 Ngondera ebiragiro bibyo
era ehyo hindeetera ohweŋala amagira aga batemu.
5 Hiisi obuhya ngendera mu ngira yiyo,
amagendere gange gahiiri njʼameene.
6 O Hatonda, kulomba era oja hungobolamo,
tegere ohutwi era oŋulire ohusaba hwange.
7 Laga ohwenda huhwo ohubitiirifu.
Nunula abo abadulumira eyi oli
abo abahwesiga, obaŋonia abalabe baawe.
8 Kuume ngʼolu ohuuma emunge yʼemoni yiyo,
kwehe mu hisisigo hyʼamabaŋa gago,
9 wuponie ababi abandumba,
abalabe abaneswanigirihise.
10 Baŋuma hisa
era baba mu hwepaahapaaha.
11 Banjenduririhise era baneswanigirihise,
bakeeta babone hiisi aŋanja, banjehoyera bakeneŋo.
12 Bali hyʼepologoma eyi njala eruma hyʼepologoma eyʼamaani
eyiri mu hyehwehere negunjiriiye ehi enalye.
13 O Musengwa, yinyoheramo, baŋiriŋanie era obaŋangule
tambisa epiima yiyo wununule ohuŋwa mu mihono jʼabahosi bʼebibi.
14 O Musengwa, mu maani gago
nunule ohuŋwa mu baatu abasuubira omuhemba
ni bahiiri mu bulamu wa hatyane.
Abo aba wenda sobalumya enjala
abaana baawe baba nʼebihena,
era babiihiraho nʼabejuhulu baawe.
15 Era ese nja huhubona olwohuba ndi mugwalaafu.
Ni nja husisimuha ohuŋwa mu hufa,
hiija hukena ohuhubona ngʼolu oli.