18
Yʼomutangirisi wʼabembi. Ya Dawudi omuŋeeresa wa Musengwa. Gembera ya Musengwa ebibono byʼolwembo luno ngʼolu gamununula ohuŋwa mu mihono jʼabalabe babe bosibosi nomu muhono gwa Sawulo. Galoma ati,
1 O Musengwa, kwenda,
ndiiwe amaani gange.
2 Musengwa njʼolwanda lwange olungadirira,
njʼepungulu yange omunehweha era njʼomununuzi wange.
Hatonda wange njʼebaale omu neŋogoma,
njʼengabo yange era olwiga olwʼobunoŋosi wange, njʼobuŋonere wange.
3 Ndanga Musengwa ohunjeeda,
asaana ohuŋeewa eŋono era gaponia abalabe bange.
4 Ohufa hwaneswanigirisa,
amataba agasihirisa ganetotera ohukenaŋo.
5 Ohufa hwaneswanigirisa,
etiisa yʼohufa yapamba.
6 Mu hubonaabona hwange nalanga Musengwa,
naliririra Hatonda wange ohunjeeda.
Gaŋulira ejanjaasi lyange nʼali mu Yekaalu yiye,
ohwerira hwange hwamwolaho, hwamugwa mu hutwi.
7 Ehyalo hyateetema era hyanyeenya nʼesimuho jʼesozi jatengeeta,
jatengeeta olwohuba Hatonda gaali aluŋire.
8 Eriisi lyaŋwera mu suulu yiye, omuliro ogugugulisa
nʼamanda agagegeeye byaŋwera mu munwa wuwe.
9 Gegulaŋo egulu nga geeha ŋaasi,
ebireri ebimali byali ŋaasi wʼamagulu gage.
10 Ganiina hu Kerubbi gagululuha,
gaguluhira hu mabaŋa gʼembeŋo.
11 Gambala ehiirema,
ehireri hyʼefula ehimali hyamweswanigirisa.
12 Enjase eyaali nʼemuŋwamo, yasaala amanda,
nga muŋwamo ebireri nʼamabaale gʼefula nʼamanda agagegeeye omuliro.
13 Musengwa gabbwabbwanuhira mwigulu,
ejanjaasi lyʼoyo Ali Ŋamugulu Obugali
lyaŋulirihana ni liŋwera ŋagati wʼamabaale gefula,
nʼamanda agʼomuliro.
14 Galasa obusaale wuwe ngʼabalabe basalaana
era ehimyaaso nʼenjase byabaleetera ohuduluma.
15 Enjuho jʼenyanja jeeta aŋalafu
nʼemisingi jʼehyalo jeeta aŋalafu.
O Musengwa, wahayula abalabe babo
era wababogohera nʼobusungu.
16 Musengwa gajanuula omuhono gugwe ohuŋwa mwigulu ganaaŋa gaatusa mu buliba.
17 Gaanunula ohuŋwa mu balabe bange abʼamaani,
abo bosibosi abacaawa, baali baakira amaani.
18 Bapiriŋania mu biseera ebigosi
aye Musengwa gakuuma.
19 Gaatusayo gapira mu hifo omu netayayira,
gaanunula olwohuba ganyenda.
20 Musengwa gaapa omuhemba olwohuba nahola ebiruŋamu,
gaapa ekabi olwohuba naŋumaho musango.
21 Hiri hiityo olwohuba ngendera mu magira ga Musengwa.
Simbaame ohuŋwa hu Hatonda wange.
22 Pambire amagambi gage gosigosi,
sinjeemera biragiro bibye.
23 Pumaho musango mu moni jije
era nehuumire ohutahola hibi.
24 Musengwa gapaaye omuhemba,
ni geema hu buluŋamu wange,
olwohuba naali pumaho hibi ehi kolire mu moni jije.
25 O Musengwa, oli mwesigwa eyiri abo abesigwa,
oli mutukuvu eyiri abagwalaafu.
26 Eyiri abo abaŋumaho mbalo, oŋumaaho mbalo
aye oŋuma hisa eyiri abahosi bʼebibi.
27 Onoŋola abo abawombeefu,
aye wiisa ŋaasi abo abehudumbasa.
28 O Musengwa, wange, huuma etaala yange ni yaduha,
Hatonda wange acuusa ehiirema hyafuuha njase.
29 Wuupa amaani ohuwaagala eŋe erinumba.
Ndiiwe owuupa amaani ohubaŋangula.
30 Amagira ga Hatonda maluŋamu
era ehibono hya Musengwa hituufu.
Njʼengabo yaabo abamwesiga.
31 Hatonda nje Musengwa yeŋene.
Era Hatonda weefe yeŋene njʼolwanda.
32 Hatonda owuupa amaani,
era njʼaluŋamya amagira gange ohuba malaŋi.
33 Ahahadasa amagulu gange gaaba hya ga namoli.
Era njʼagira nasobola ohugendera hu sozi.
34 Gatendeha ohuba omusooli
era emihono jange jisobola ohufuda omubaso ogwʼehyoma ehigumu.
35 O Musengwa, wukuuma
era wunoŋola, obuyeedi wuwo wandeetera ohuba wʼamaani.
Ohundabirira huhwo humbesaŋo.
Era wukuuma ni puma ehiitya.
36 Ogalamya engira omu mbita,
amagulu gange sigaterera.
37 Nabbinga abalabe bange naboolaho
sinaagamayo ohwola olu nabasihiirisa.
38 Nabaminiangula ndibasobole hwinyoha,
bagwa ŋaasi wʼamagulu gange.
39 Waapa amaani ohusoola etalo,
waleetera abalabe bange ohukubbira amafuha.
40 Waleetera abalabe bange ohunduluma,
era nasihiirisa abo abacaawa.
41 Baalira ni baana hwana
ni benda babayeede, ne ŋaŋuma owʼohubaŋonia.
Beegayirira Musengwa aye sigabagobolamo.
42 Nabaŋuula nabaheneramo erala
bafuuha hyʼefuuhe eyi embeŋo edumuusa,
naboŋaania hyʼagoŋaania amadosi mu nguudo.
43 Waanunula ohuŋwa mu baatu abakiyaania,
wufuula muŋugi wʼamawanga,
abaatu aba naali ni tamanyire, bali ŋaasi wange.
44 Abanamawanga bakubbira amafuha
era ni baŋulira ejanjaasi lyange, bangondera.
45 Bosibosi baŋwamo amaani,
baŋwa mu byehwehero byawe ni bateetema huteetema.
46 Musengwa njʼomwene bulamu!
Mujumirye oyo olwanda lwange,
langirira obubbala wa Hatonda omunoŋosi wange.
47 Njʼagira naŋangula abalabe bange,
njʼagira amawanga gaaba ŋaasi wange.
48 Njʼowuponia abalabe bange.
O Musengwa, wuupa ohuŋangula abalabe bange,
wuponia abaatu abahambwe.
49 Olwʼehyo nja huhujumirya mu mawanga O Musengwa,
nja hwemba enyembo ni kujumirya.
50 Hatonda aŋa habaha wuwe obuŋangusi owʼamaani.
Alaga ohwenda huhwe ohubitiirifu,
eyiri oyo oyu gajuhaho amafuta,
eyiri Dawudi nʼabolulyo lulwe emirembe nʼemirembe.