19
Yʼomutangirisi wʼabembi. Ezabbuli ya Dawudi.
1 Egulu liroma hu eŋono lya Hatonda,
nʼebiri mu bbanga biraga omulimo gugwe.
2 Hiisi mu muusi biroma
era hiisi wiire biraga amagesi gage.
3 Ŋaŋumaaŋo ndoma oba olulimi
aŋa janjaasi lyabyo litaŋulirihana.
4 Ejanjaasi lyabyo, lihwana ehyalo hyosihyosi
nʼebibono byabyo hiisi muutu gabiŋulira.
Mwigulu gemehera eryuba eweema,
5 ehiri hyʼohuuja hwʼomugole omusinde,
aŋwera mu hisenge hihye,
hyʼomuutu asingire embiro.
6 Eryuba liŋwera ebuŋwalyuba,
nga lyetoloola ohwola olu ligwa
mu maaji hu luuyi olundi
era ŋaŋuma ehitolaho bubalire waalyo.
7 Egambi lya Musengwa lyolana,
ligobosamo amaani.
Ebiragiro bya Musengwa byesigiha,
abatali bagesi, bibafuula bagesi.
8 Ohwigirisa hwa Musengwa hutuufu,
husangaasa omwoyo.
Amagambi ga Musengwa njase,
gatuleetera obutangaafu.
9 Ohutya Musengwa hyawufu emirembe nʼemirembe.
Musengwa asalaaŋo nʼatehubbira era ebi asalaŋo biba biruŋamu.
10 Byamuŋendo bugali ohuhira ezaabbu, ezaabbu ehira obulaŋi.
Biŋomerera ohusinga omudugere,
omudugere ogwomu biyali.
11 Birabula omuŋeeresa wuwo,
ohubigondera hipeesa omuhemba mubbala.
12 Aye njʼani omwene asobola ohumanya esobi jije?
O Musengwa, soniŋe ebibi byange ebyomu ngiso.
13 Huuma omuŋeeresa wuwo tahola bibi mu hugenderera era bitaŋuga mwoyo gagwe.
Ehyo hija hufuula aŋumaaho mbalo, hija hutusaho ehibi.
14 Leha ebibono byange nʼebiŋeego byʼomwoyo gwange, bihwesiimise,
O Musengwa, olwanda lwange era omununuzi wange.