20
Yʼomutangirisi wʼabembi. Ezabbuli ya Dawudi.
1 Musengwa ahuŋe ebi omusunga nʼoli mu bigosi.
Hatonda wa Yakobbo ahuhingirise.
2 Ahuŋe obuyeedi nʼali mu hifo ehyawufu,
era ahuŋe amaani ohuŋwa mu Sayuuni.
3 Ahebulire eŋongo liryo lyosiryosi,
era afugiirire ebirabo bibyo ebi bohya ebihwiye byaguhuliha.
4 Ahuŋe ehi mwoyo gugwo guŋembaho,
era ahuyeede ebi otegeha byosibyosi byolerere.
5 Huja husaŋalya nʼoŋanguuye abalabe beefe
era huja huginga ebbendera jeefe ni hujumirya Hatonda.
Musengwa ahuŋe byosibyosi ebi omusunga.
6 Ŋaahani manyire ti Musengwa
anoŋola oyu gajuhaho amafuta,
ahugobolemo nʼali mwigulu, olwʼamaani gage.
7 Abandi besiga amagaali, nʼabandi besiga embalaasi.
Aye efe hwesiga Musengwa Hatonda weefe.
8 Balyetega bagwa aye efe huliba bʼamaani
era hulyemeerera ni huli bagumu.
9 O Musengwa, ŋa habaha obuŋangusi.
Tugaluheemo ni huhulomba.