21
Yʼomutangirisi wʼabembi. Ezabbuli ya Dawudi.
1 O Musengwa, habaha musangaafu
olwohuba omuŋaaye amaani.
Asaŋalya olwohuba wamuŋa obuŋangusi.
2 Omuŋaaye ebi mwoyo gugwe guŋembaho,
era eŋuma ehi wasigasa hu bigasunga.
3 Wamwanirisa ohuŋwa mu lutalo
era ngʼomuŋa ekabi eja hiisi ngeri,
ngʼomufiiha hu mutwe engule eyʼezaabbu enyene nʼenyene.
4 Gahusunga obulamu era wabumuŋa,
owʼemirembe nʼemirembe.
5 Obuŋangusi obu wamuŋa, wamuleetera eŋono eryene ebbala.
Omuŋaaye efuma gamanyihana.
6 Mu butuufu oweene omuŋaaye ekabi ejʼemirembe nʼemirembe,
era ohubaaŋo huhwo humuleetera esangaalo.
7 Hiri hiityo olwohuba habaha gesiga Musengwa,
era olwʼohwenda ohubitiirifu ohwʼoyo Ali Ŋamugulu Obugali
saaja huŋwa hu tebe eyʼobuŋugi atyo atyo.
8 Habaha aja huŋamba abalabe babo bosibosi hunyama,
omuhono gugwo omulungi ogwʼamaani guja huŋamba hu abo bosibosi abahucaawa.
9 Mu hiseera ehi oliboneheramo,
oli basihiirisa nʼomuliro ogwʼamaani.
Alibasihiirisa nʼobusungu.
Musengwa mu busungu wuwo oja hubamira
era omuliro gugwo guja hubahenaŋo.
10 Oja husihiirisa olulyo lwawe ohuŋwa hu hyalo,
habaha alibeeta bosibosi.
11 Wayire behobana ohuhuhola ehibi,
aye sibalihusobola nʼekwe jaawe,
12 hiriba hiityo olwohuba olirasa obusaale wuwo
era balicuuha baduluma embiro.
13 O Musengwa, oŋeewe eŋono, olwʼamaani gago,
huja hwemba era huhujumirye olwʼobuŋangi wuwo.