22
Yʼomutangirisi wʼabembi. Ohwemba ni batiinira hu janjaasi “Eryomu mugamba.” Ezabbuli ya Dawudi.
1 Hatonda wange, Hatonda wange,
lwahiina wundehireŋo?
Lwahiina siwunjeeda era soŋulira hubinda hwange?
2 O Hatonda wange, neririgana omuusi, sogobolamo!
Owiire kweriririra ni talehera,
3 atenga weehala hu tebe eyʼobuŋugi,
ngʼOmwawufu ndiiwe oyu Yisirayiri aŋa eŋono.
4 Ndiiwe oyu basehulu beefe beesiga,
bahwesiganga era wabanunula.
5 Bahweriririra era wabanunula,
ndiiwe oyu beesiganga era siwabaswasa.
6 Aye abaatu baloma mbo ndi oti nyende era puma mahulu.
Abaatu bosibosi banduha era banyooma.
7 Bosibosi banjerega era banduulira
banyeenya nʼemitwe jaawe ni baloma baati,
8 “Gesiga Musengwa,
olwʼehyo Musengwa amununule, olwohuba amwenda.”
9 Aye waatusa mu hida hya maama,
wandeetera ohuhwesiga ni naali ni kiiri hwibeere lya maama.
10 Ohuŋwa saliiwe, kwesiga
era ohuŋwa mu hida hya maama obaaye Hatonda wange.
11 Otandanyiririra, olwohuba ebigosi bindi bubi,
era ŋaŋuma wʼohunjeeda.
12 Abalabe bangi baneswanigirihise hyʼebunwa,
banjetolooye hyʼebunwa engwiri ejomu hyalo hyʼe Bbasani.
13 Hyʼepologoma ejiŋuluguma,
basamya eminwa ni banjetotera ohundya.
14 Amaani gapooye era ndi hyʼamaaji agajijuhire,
nʼamagumba gange galojohire.
Omwoyo gwange gusaanuhire.
15 Amaani gange gahomire, ndi hyʼolujo
nʼolulimi lwange lwerapire, ŋamugulu mu munwa.
Wundehire ohutiina mu fuuhe emagombe.
16 Agabwa gajeswanigirihise,
ehibbubbu hyʼabahosi bʼebibi banjetolooye
basimitire simitire ebyaba byʼengalo nʼamagulu gange.
17 Nondolohire bugali weene
era sobola ohubala nʼamagumba gange,
abakejaho banehaata.
18 Bagabana ebyambalo byange
era engoye jange bajihubbiraho ahalulu.
19 Aye Musengwa, otamba ŋaleeŋi.
Ewe amaani gange, yanguŋaho wunjeede.
20 Ponie epiima,
omwoyo gwange ogwʼebbeeyi, guŋonie embwa.
21 Nunule mu meeno gʼepologoma,
ponie ameega gʼembogo.
22 Nahamanyisa abalebe bange obuhulu wʼesiina liryo,
nahembe ni kujumirya mu humbaaniro.
23 Enywe abatya Musengwa mumutenderese.
Enywe abejuhulu ba Yakobbo mwesimwesi, mujumirye Musengwa.
Abejuhulu ba Yisirayiri mwesimwesi, muŋe Musengwa eŋono.
24 Hiri hiityo olwohuba sanyooma bagadi,
oba ohutaafayo hu bulumi wʼoyo ali mu higosi,
samwehwehe aye aŋuliiye ohwerira huhwe.
25 Mu ewe funa omulamwa ohuhuŋa eŋono
mu moni jaabo abahutya, nja hwoheresa ohweyama hwange.
26 Abagadi baja hulya beegute,
abo abendula Musengwa balimujumirya,
babenga balamu emirembe nʼemirembe.
27 Amawanga gosigosi galihebulira Musengwa,
era abaatu hu hyalo bosibosi balihubba amafuha mu moni jije,
28 olwohuba Musengwa nje habaha,
era aŋuga amawanga gosigosi.
29 Bosibosi abaŋinda hu hyalo balirya embaga
era bajumirya Musengwa,
bosibosi balimuhubbira amafuha.
30 Abaana aba balisaala balimuŋeeresa,
abaatu baliromera abʼomulembe oguuja ebiŋamba hu Musengwa.
31 Abaatu abahiiri husaaliwa balibalomera baati,
“Musengwa ganoŋola abaatu babe.”