83
Olwembo. Ezabbuli ya Asafu.
1 O Hatonda, otaŋoleera huŋoleera
O Hatonda, otaba aŋo ni ŋaŋuma ehi oloma.
2 Bona abalabe babo benyoheene,
abo abahucaawa bahujeemera.
3 Bahola ekwe hu baatu babo.
Bacuhiiye abaatu babo abahoda.
4 Baloma baati, “Muuje hutiine hubasihiirise ngʼegwanga,
esiina lya Yisirayiri ligote batagobolayo hulihebulira nindi.”
5 Era bosibosi beesa hirala mu tegeha yaawe,
beehobana ohuhuyeekera,
6 eweema jʼEdomu nʼAbayisimayiri
ohuŋwa e Mowaabbu nʼAbahagari,
7 nʼAbagabbali nʼAbamooni,
Abameleki nʼAbafirisuuti ko nʼabaatu bʼe Tiiro.
8 Era ni Busuuli yibegaatireho
ohuyeeda olulyo lwa Luuti.
9 Bahole ngʼolu waahola Abamidiyaani
ngʼolu waahola Sisera ni Yabbini hu lwabi Kisoni,
10 aba wasihiirisa mu Endori
era emibiri jaawe jabolera hwiroba.
11 Hola abatangirisi baawe ngʼolu waahola Orebbu ni Zeebbu
hola abatangirisi baawe ngʼolu waahola Zeebba ko ni Zalumuuna.
12 Abaatu abo baloma baati,
“Muhole hweŋirire ehyalo hya Hatonda.”
13 O Hatonda wange,
basalaanie ngʼolu mbeŋo esalaania ebisasiro,
14 hyʼolu muliro gugugulisa amadeŋo
oba hyʼolu omuliro gwohya olusozi,
15 babbinge nʼomuyaga gugwo ogwʼamaani,
era batiise ni hibuyaga wuwo.
16 O Musengwa, baleetere ohuswala ko abaatu bahategeera amaani gagwo.
17 Balehe esoni jibahubbe emirembe nʼemirembe,
leha basihiirihe ni ŋaŋuma abaŋa eŋono.
18 Leha bamanye baati ewe Musengwa
ewe weŋene ndiiwe Ali Ŋamugulu Obugali
aŋuga hiisi hiitu hu hyalo hyosihyosi.