84
Yʼomutangirisi wʼabembi. Ohuyemba ni batiinira hu gitisi. Ezabbuli yʼabaatu bomu lulyo lwa Koora.
1 O Musengwa Omwene Maŋe,
ngʼenyumba yiyo ndaŋi!
2 Obulamu wange wuŋemba bugali hu huba mu lunya lwa Musengwa,
omwoyo nʼomubiri byeriririra Hatonda Omwene Bulamu.
3 Ni namuhuuji asunire amago atongola ehitala
aŋa namalala ahuumira owaana waayo huupi nʼehituuti hihyo
O Musengwa Omwene Maŋe,
habaha wange era Hatonda wange.
4 Besiimire abo ababa mu nyumba yiyo,
baba muhuhujumirya hiisi hiseera.
5 Besiimire abo abahufuula ewe ohuba amaani gaawe
abo abalumirwa ohutiinanga mu nyumba yiyo hu lusozi Sayuuni ohuhujumirya.
6 Ni babita mu hiiho hyʼe Bbaka ehiŋumamo maaji,
balihifuula ehifo ehyʼamaaji,
hyejula nʼefula eyisookera erala ni huŋwa mu hiseera hyʼendobooli.
7 Abaatu babo beyongera ohusuna amaani
era baja hwola hu lusozi Sayuuni mu moni ja Hatonda.
8 O Musengwa Hatonda Omwene Maŋe,
ŋulira ohusaba hwange.
O Hatonda wa Yakobbo, puliirise.
9 O Hatonda, ŋa habaha weefe ekabi
era oyu watobola omuhejeho nʼehisa.
10 Oludaalo lulala olukenera mu lunya lwa Yekaalu yiyo,
luhira endaalo olukumi ejikenera aŋaatu aŋandi.
Era mala gaba muhuumi ŋa mulyango gwʼenyumba ya Hatonda wange
ohuhira ohumenya mu weema jʼabahosi bʼebibi.
11 Hiri hiityo olwohuba Musengwa Hatonda
njʼeryuba era engabo yeefe
gandaga ehisasabirisi era gafuula owʼeŋono.
Saŋanga hutaŋa ebiraŋi abo abahola ebiruŋamu.
12 O Musengwa Omwene Maŋe,
gesiimire oyo ahwesiga.