85
Yʼomutangirisi wʼabembi. Ezabbuli yʼabaatu bomu lulyo lwa Koora.
1 O Musengwa, waaŋa ehyalo hihyo ekabi
era oleeteeye abejuhulu ba Yakobbo ohuba bulaŋi.
2 Wasoniŋa ohubbenga hwʼabaatu babo
era wabatusaho ebibi byawe byosibyosi.
3 Walehera aŋo ohutuluŋira
nʼohuba nʼobusungu bungi eyi huli.
4 O Hatonda Omunoŋosi weefe, tugobose bunyaaha
era olehere aŋo ohutuluŋira.
5 Oja hutuluŋira emirembe nʼemirembe?
Oja hweyongera ohuba nʼobusungu?
6 Sooja hutugobosa bunyaaha nindi,
abaatu babo basangaale hu lwʼewe?
7 O Musengwa, tulage ohwenda huhwo ohubitiirifu
era otunoŋole.
8 Nja huŋuliirisa ehi Hatonda Musengwa aja huloma,
olwohuba asuubisa abaatu abagwalaafu babe emiyaaya
ohutusaho batagobolayo mu buŋubeebe waawe.
9 Mu butuufu oweene ali ŋaapi
ohunoŋola abo abamutya
ko eŋono lirye lihwane ehyalo hyefe.
10 Ohwenda nʼowesigwa byeŋimbire
era obuluŋamu nʼemiyaaya bigwijana mu hifuba.
11 Owesigwa buŋwera mu hyalo hino
obuluŋamu busiziira mwigulu nga wiiha ŋaasi hu hyalo.
12 Musengwa aja hutuŋa ebiraŋi
era ehyalo hyefe hija hwama ebibala bingi bugali.
13 Obuluŋamu bumutangiriramo
era wamweyulira engira omu abita.