86
Esaala ya Dawudi.
1 O Musengwa, tegere ohutwi era wungobolemo,
olwohuba ndi mugadi era ndi mu wetaavu.
2 Huuma obulamu wange olwohuba neŋayeeyo eyi oli.
Oli Hatonda wange, noŋola omuŋeeresa wuwo,
oyo ahwesiga.
3 O Musengwa pambire ehisa
olwohuba oludaalo luŋwerereraho ni kweriririra.
4 O Musengwa sangaasa omuŋeeresa wuwo
olwohuba nahuŋambya obulamu wange.
5 O Musengwa osoniŋa era oli mulaŋi
olaga ohwenda ohubitiirifu eyiri abo bosibosi abahujumirya.
6 O Musengwa, ŋulira ohusaba hwange,
ŋuliirisa ohulira hwange ni sunga wupambire ehisa.
7 Ni ndi mu bugosi
kulanga olwohuba oja hungobolamo.
8 O Musengwa, ŋaŋumaaŋo hatonda ali hyʼewe.
Era ŋaŋumaaŋo wayire mulala ahola ebi ohola.
9 O Musengwa, amawanga gosigosi aga watonda gaja huuja gahujumirye
era gaja huhuŋa eŋono.
10 Hiri hiityo olwohuba oli wʼamaani
era ohola ebyeŋunjisa,
ewe weŋene ndiiwe Hatonda.
11 O Musengwa, somese amagira gagwo
era nja hugendera mu mazima gago.
Pe omwoyo ogubulamo wasiwaasi, nahahuŋa eŋono.
12 O Musengwa Hatonda wange,
nja huhujumirya nʼomwoyo gwange gwosigwosi
nja huhujumirya emirembe nʼemirembe.
13 Hiri hiityo olwohuba ohwenda ohuwunyendamo hubitiirifu,
wanunula ohuŋwa emagombe mu hufa.
14 O Hatonda, abo abehudumbasa banumba,
abaatu abahambwe bendula obulamu wange
abaatu abatahutya.
15 Aye ewe Musengwa oli Hatonda owʼehyere
era oli nʼehisasabirisi,
olwaŋo ohuluŋa wijuuye ohwenda nʼowesigwa.
16 Cuuha eno wupambire ehisa,
ŋa omuŋeeresa wuwo amaani,
onoŋole omusaani wʼomwidu wuwo omuhasi.
17 Musengwa, pe ahabonero ahalaga ngʼolu oli mulaŋi
ko abalabe bange baswale olwohuba bunjedire.