88
Olwembo. Ezabbuli yʼabaatu bomu lulyo lwa Koora. Yʼomutangirisi wʼabembi. Ohuyemba ni batiinira hu mahalasi liyanosi. Masikili ya Hemani Omuzirahiti.
1 O Musengwa Hatonda omunoŋosi wange,
kweriririra omuusi nʼowiire.
2 Ŋulira ohusaba hwange,
ŋuliirisa ohulira hwange.
3 Nijuuye bigosi byereere
era ohufa hundi ŋaapi.
4 Bambala ohuba mulala hubatiina emagombe,
ndi hyʼoŋuma maani.
5 Bandeha ohuba ŋalala nʼabafu
hyʼabafu abali emagombe aba otahebulira,
abo aba otayeeda.
6 Wundanya mwiroŋo ereeŋi eryene
era erijuuye ehiirema ehiŋambire oti ngu.
7 Obusungu wuwo bungi hu bulamu wange,
amayengo gago ganyigiirisa.
8 Wutuhiseeho abameeri bange,
wufuuye hyenyinyasa eyi bali.
Ndi musibe atasobola huŋwa mu busibe.
9 Emoni jange sijibona olwʼenaku eyi ndimo.
Musengwa, hiisi ludaalo kusunga obuyeedi,
ngolola emihono ni saba.
10 Oholera abafu ebyamaliholiho?
Abafu benyoha bahujumirya?
11 Abanamagombe basobola ohuloma hu hwenda huhwo ohubitiirifu
nʼowesigwa wuwo mu hifo ehyʼohusihiiriha?
12 Ebyamaliholiho bibyo babimanyire mu hiirema
oba obulaŋi wuwo mu hyalo hyʼabo aba berabira?
13 Aye Musengwa kusunga obuyeedi
era mu mugamba kusunga.
14 Lwahiina Musengwa wukubbire omugongo
era nʼohukejaho siwenda hukejaho?
15 Mbweneweene ohuŋwera erala mu buvubuka huupi fe nʼohufa
era pooye embaha olwʼebibonerezo bibyo.
16 Ehiruŋi hihyo hikenireeŋo
era ohunyigirisa ohubunyigirisa husihiirihise.
17 Baneswanigirisa oludaalo lwosirwosi hyʼamataba,
banjetolooye enjuyi josijosi.
18 Ogimire abameeri bange ni naabo aba nenda bapwaho
era ehiirema nje meeri yange.