89
Masikili ya Esani Omuzirahiti.
1 Nja hwemba hu hwenda hwa Musengwa ohubitiirifu emirembe nʼemirembe.
Nja huloma hu wesigwa wuwe eyiri abaatu emirembe josijosi.
2 Nja hulangirira ebiŋamba hu hwenda huhwo ohwʼemirembe nʼemirembe,
owesigwa wuwo sibuŋwaŋo hyʼegulu.
3 Waloma oti, “Nahola endagaano nʼomutobole wange.
Nalayirira Dawudi omuŋeeresa wange ti,
4 ‘Mu lulyo lulwo muja hubaamo omuŋugi nga habaha
emirembe nʼemirembe.’ ”
5 Musengwa egulu lihutendereza olwʼebyamaliholiho bibyo
era leha abamalayika bahutendereze olwʼowesigwa wuwo.
6 Njʼani ali mwigulu owegerageraniaho hu Musengwa?
Hu abo abali mwigulu njʼani ali hya Musengwa?
7 Hatonda bamutya mu luhiiho lwʼabawufu,
atiisa ohuhira bosibosi abamweswanigirihiise.
8 O Musengwa Hatonda Omwene Maŋe,
O Musengwa, njʼani ali hyʼewe!
Era oli mwesigwa mu biitu byosibyosi.
9 Oŋuga obusungu wʼenyanja,
obunjeesa amayengo agatumbera.
10 Wabbwagabbwaga Rahabbu,
wasalaania abalabe babo nʼobuŋangi wuwo owʼamaani.
11 Egulu nʼehyalo bibyo,
nʼebibirimo byosibyosi bibyo olwohuba ndiiwe owabihola.
12 Watonda amaniino nʼamehiriro,
esozi Tabbori ni Herumooni jihwembera nʼesangaalo.
13 Oli nʼobuŋangi,
amaani gago gaŋamugulu
era omuhono gugwo gwʼamaani mangi.
14 Obuluŋamu nʼohutehubbira
njʼomusingi gwʼobuŋugi wuwo,
ohwenda nʼowesigwa njʼebi oholeraho.
15 O Musengwa, besiimire abo abahujumirya,
abamenya mu njase eyʼehyere hihyo.
16 Basangaala oludaalo lwosirwosi
era bahujumirya olwʼobulaŋi wuwo
17 olwohuba ndiiwe ogima baba nʼeŋono nʼamaani
era otuŋa obuŋangusi olwʼehisa hihyo.
18 Mu butuufu Musengwa njʼengabo yeefe
era Omwawufu wa Yisirayiri gaatuŋa habaha weefe.
19 Mu biseera ebyahale waloma abaatu babo
abesigwa mu hwolesewa oti, “Paaye omusooli amaani,
nenyosa omuvubuka oyu natobola namuŋa etebe eyʼobuŋugi.”
20 Paaye Dawudi omuŋeeresa wange owahabaha
era mujuhireeho amafuta amawufu.
21 Nabenga ni naye
era mu butuufu nja humuŋa amaani.
22 Abalabe babe sibaja humuŋangula
ŋaŋuma muhosi wʼebibi aja humunyigirisa.
23 Nja husihiirisa abalabe babe nʼabona
abo abamucaawa baja hufa.
24 Nja humwenda era mbe mwesigwa eyi ali,
era nʼabita mu ese aja huba wʼamaani.
25 Nja hugalamya owahabaha wuwe ohuŋwa hu nyanja Meditereniani
ohwolera erala hu lwabi Yufuleeti.
26 Aja huloma ati, “Ndiiwe Bbaabba Hatonda wange,
olwanda lwange era omunoŋosi wange.”
27 Nja humufuula mwana wange omudaayi
ahira abahabaha bosibosi hu hyalo.
28 Nja humwenda emirembe nʼemirembe
era endagaano yange ni naye yʼemirembe nʼemirembe.
29 Mu lulyo lulwe muja huŋwamo habaha
aja huŋuga emirembe nʼemirembe
era etebe yiye eyʼobuŋugi yija hweyongera ohubaaŋo hyʼegulu.
30 “Singa abejuhulu babe babbwaga amagambi gange
era bagaana ohugondera ebiragiro byange,
31 singa banyooma ebiragiro byange,
amagambi gange gabahaya ohuhuuma,
32 nja hubahangavula olwʼebibi byawe,
nja hubabonyaabonya olwʼobujeemu waawe
33 aye sinja huleheraŋo hubenda
era nja husigala ni ndi mwesigwa eyi bali.
34 Sinja hubbwaga ndagaano yange
oba ohucuusamo ehi nasuubisa.
35 Mu wawufu wange nalayira nahena
era sinja hudulinga Dawudi.
36 Mu lulyo lulwe muja huŋwamo habaha owʼemirembe nʼemirembe
era owahabaha wuwe bulibereraŋo hyʼeryuba.
37 Obuŋugi wuwe buja hubaaŋo hyʼomwesi hwigulu,
obujulizi owʼamazima hwigulu.”
38 Aye oluŋiiye habaha wuwo oyu watobola
era omuhubbire omugongo.
39 Obbwagire endagaano yiyo eyi waahola nʼomuŋeeresa wuwo
era engule yiye oyidanyire mu fuuhe.
40 Olukomera olwʼehiteepe hihye ehyʼehibuga olubbwagire,
walufuula gunda era watangajula ebibagadirira.
41 Ababitaŋo bosibosi beeba ebibye
era nʼabaliranwa babe bamujeherera.
42 Abalabe babe obaŋaaye obuŋangusi
era obaŋaaye esangaalo.
43 Ebisoosa bibye sibihiiri byamugaso
era omulehire bamuŋangula.
44 Omutuhiseeho eŋono,
odanyire etebe yiye eyʼobuŋugi ŋaasi.
45 Omuhayiriŋihiisye nʼahiiri muŋere era omuswahiise.
Era omuhubbire esoni.
46 O Musengwa, olihyosa ŋeena ohutwehweha emirembe nʼemirembe?
Onahoseŋe ohuba nʼehiruŋi ehyohya hyʼomuliro?
47 Hebulira oti obulamu wange wʼehiseera buseera.
Hebulira oti watutonda baatu buutu hwesihwesi.
48 Njʼani atalifa
oba genoŋola ohutatiina emagombe?
49 O Musengwa, ohwenda huhwo ohwahale ohubitiirifu,
ohuwasuubisa Dawudi mu wesigwa wuwo huli ŋeena?
50 Musengwa, hebulira ngʼolu baduuye omuŋeeresa wuwo,
ngʼolu ngumiiye ebiduho byʼabaatu bangi.
51 O Musengwa, abalabe babo baduha oyu wajuhaho amafuta,
bamuduha hiisi aŋa aja.
52 O Musengwa, aŋeewe eŋono emirembe nʼemirembe!
Amiina era Amiina.