90
Ohusaba hwa Musa, omuutu wa Hatonda.
1 Musengwa, ohuŋwa ahale nahale obaaye mago geefe.
2 Konyo otonde esozi oba konyo otonde ehyalo nʼebirimo,
waaliŋo era oli Hatonda emirembe nʼemirembe.
3 Wagamyayo abaatu mwiroba
obaloma oti, “Mwagameyo mwiroba, enywe abaana bʼabaatu.”
4 Emyaha olukumi hu ewe jiri hyʼoludaalo olwejo olwabitire
oba hyʼesaawa ejohuŋungulaho endiidiri mu wiire.
5 Ogima abaatu batiina emagombe mangumangu,
bali hyʼenyaasi eryahamera mu mugamba,
6 wayire mu mugamba limera,
ne aŋa wirira liba liŋotohire nga lyoma.
7 Obusungu wuwo butusihiirisa,
onaluŋa nga hweŋendeherera.
8 Ebibi byefe biri ŋalafu eyi oli,
obona ebibi byefe ebyomu ngiso.
9 Emyaha jeefe jisaliwaho olwʼobusungu wuwo,
obulamu weefe hubuhena ni hulira.
10 Obungi wʼendaalo ejʼobulamu weefe jiri emyaha esanvu,
oba kinaana hunaba ni huli bʼamaani,
atenga jiba jijuuye ohubonaabona nʼebigosi.
Jiduluma mangu, nga huŋwaŋo.
11 Njʼani amanyire amaani gʼobusungu wuwo?
Njʼani amanyire etiisa eyi busungu wuwo buleeta?
12 Tusomese obuupi wʼendaalo jʼobulamu weefe,
hyahatuleetera ohubaamo amagesi.
13 O Musengwa, olyosa ŋe ohuba nʼobusungu?
Ŋambira abaŋeeresa babo ehisa.
14 Otwijusenga nʼohwenda huhwo ohubitiirifu mu mugamba,
hwahemba nʼesangaalo era husaŋalyenga endaalo josijosi ejʼobulamu weefe.
15 Tuŋe esangaalo ohutusasula ebiseera bira ebyʼohubonaabona,
emyaha emingi ejo eji hubaaye nʼebigosi.
16 Olage abaŋeeresa babo ebyamaliholiho,
olage abejuhulu baawe eŋono liryo.
17 Leha ehisasabirisi hya Musengwa Hatonda weefe hitubeho,
leha byosibyosi bitutiinire bulaŋi,
byosibyosi bitutiinire bulaŋi.