91
1 Hiisi amenya mu hisisira hyʼoyo Ali Ŋamugulu Obugali,
asuna obuhuumi wʼOmwene Buŋangi.
2 Era nalomenga ti, “Musengwa ndiiwe olwanda lwange era omuhuumi wange,
oli Hatonda wange oyu nesiga,”
3 Era mu butuufu aja huhuŋonianga emitego jʼabalabe
era ahuŋonie ni haŋupuli.
4 Anahuwihenga namabaŋa gage,
wasunira omwo obuŋonere.
Era owesigwa wuwe bunaabenga ngabo yiyo.
5 Sonatyenga hiitu hyosihyosi owiire,
oba obusaale obu balahiise mu muusi
6 oba ohutya haŋupuli agwaŋo mu njirema,
oba namusisa abaluhaŋo mu muusi.
7 Abaatu ekumi nʼekumi balifiira aŋo nʼobona,
aye ewe ŋaŋuma ehiri hwolaho kadi.
8 Olibona nʼemoni jijo
omubi nʼasuna ehibonerezo.
9 Musengwa njʼohugadirira,
era Ali Ŋamugulu Obugali njʼomuhuumi wuwo.
10 Era ŋaŋuma higosi hyosihyosi ehija huhwolaho,
ŋaŋuma ehija hwola hu mago gago.
11 Hiri hiityo olwohuba Hatonda aliragira
abamalayika babe bahuyeeda.
12 Era balihubbaha
ndiwegumula hu mabaale huhulumya magulu.
13 Oja hutyakirira epologoma nʼekolokima
oja hwema hu pologoma ekambwe nohu gusota.
14 Musengwa aloma ati, “Nja huŋonia abo abanyenda.
Era nja huhuuma abo abaamanyire.
15 Anaabenga nʼebigosi gandanga,
nja humugobolangamo
era mbe ŋalala ni naye muhuume era muŋe eŋono.
16 Nja humuleetera ohuŋangala era munoŋole.”