92
Ezabbuli. Olwembo. Ohwemba hu lwa Sabbaato.
1 Hiraŋi ohweyaasa Musengwa
nʼohwembera Ali Ŋamugulu Obugali enyembo,
2 ohulangirira ohwenda huhwo mu mugamba
nʼowesigwa wuwo owiire,
3 nʼohuhubba ogutongooli, ehifuga ehyʼewaaya ehumi
ko nʼahatongooli.
4 O Musengwa, ndi musangaafu olwʼebi ohola,
olwʼebi oholire, nemba nʼesangaalo.
5 O Musengwa, nga ebi ohola byeŋunjisa,
ngʼebiŋeego bibyo bija hireeŋi.
6 Omuutu ataŋeega, saamanyire
era abaŋubeebe baŋuma hutegeera,
7 baati wayire abahosi bʼebibi bameruha hyʼenyaasi,
baja hubasihiirihisa erala.
8 Aye ewe Musengwa oja
hutuŋuga emirembe nʼemirembe.
9 Musengwa, mu butuufu oweene abalabe babo,
mu butuufu oweene abalabe babo baja husihiiriha,
abahosi bʼebibi bosibosi baja huboŋaania.
10 Wupaaye amaani hya gʼebunwa yʼeŋombe,
wunjuhireeho amafuta amalaŋi.
11 Samwene neboneyeeho ni baŋangula abalabe bange,
amatwi gange gaaŋulira ebiŋamba huhusihiiriha hwʼabahosi bʼebibi.
12 Abagwalaafu baja huhulahulana hyʼomuhindu,
baja huhula hyʼemitumba jʼe Lebbanooni,
13 ogu bahoma mu nyumba ya Musengwa
era jija hweyagalira mu lunya lwa Hatonda.
14 Jija hwama ebibala nomu buhayire waajo,
jija husigala ni jitooma.
15 Ehyo hiraga hiiti Musengwa sigehubbira
njʼolwanda lwange era aŋuma hibi mu ye.