96
1 Yembera Musengwa olwembo olunyaaha,
enywe abaatu hu hyalo hyosihyosi mwembere Musengwa.
2 Yembera Musengwa omwebase, hiisi ludaalo mulangirire ngʼolu gatunoŋola.
Mulangirire eyiri amawanga ngʼolu ali nʼeŋono.
3 Mulangirire eyiri amawanga ngʼolu ali nʼeŋono,
mulome hu ebyamaliholiho ebi aholera abaatu.
4 Hiri hiityo olwohuba Musengwa wʼamaani bugali era asaana ohumutendereza,
abaatu bali nʼohumutya ohuhira abahatonda abandi bosibosi.
5 Abahatonda abamawanga bosibosi biwumbe buwumbe,
aye Musengwa gatonda egulu.
6 Eŋono nʼobuhulu,
obuŋangi nʼobuŋoono bijuuye mu hifo hihye ehyawufu.
7 Hiisi hiha hyʼabaatu mwesimwesi muŋe Musengwa eŋono,
mumujumirye olwʼamaani nʼeŋono lirye.
8 Muŋe Musengwa eŋono erimusaanira,
muleete ehirabo era mutiine mu lunya lwa Yekaalu yiye.
9 Mujumirye Musengwa mu wawufu wuwe,
leha ehyalo hyosihyosi hiteeteme mu moni jije.
10 Mulomere amawanga muuti, “Musengwa aŋuga.”
Ehyalo higumu sihitengeta era sihisagasagana, alisalira abaatu emisango nʼatehubbira.
11 Leha egulu lisangaale nʼehyalo hisaŋalye,
leha enyanja nʼebirimo byosibyosi biŋuume.
12 Leha endimiro yisaŋalye nʼebirimo byosibyosi.
Emisaala mu madeŋo jija hwemba olwʼesangaalo,
13 jija hwemba mu moni ja Musengwa olwohuba gaaja,
gaaja ohusalira ehyalo emisango.
Aja husalira ehyalo emisango mu buluŋamu,
asalire abaatu emisango mu mazima.