97
1 Musengwa aŋuga, leha ehyalo hisaŋalye,
leha ebizinga byosibyosi bisangaale.
2 Ebireri nʼehiirema ehiŋambire oti ngu bimweswanigirihiise,
obuŋugi buwe wijuuye obuluŋamu nʼohutehubbira.
3 Omuliro guŋwera aŋa ali,
gwohya abalabe babe abamweswanigirihiise.
4 Ahubba ehimyaso hu hyalo,
abaatu babona bateetema.
5 Esozi jisanuuha hyʼamasavu mu moni ja Musengwa
mu moni ja Musengwa wʼehyalo hyosihyosi.
6 Ebitonde ebiri mwigulu biraga biiti Musengwa ahola ebiruŋamu
era hiisi muutu abona eŋono lirye.
7 Aswasa hiisi muutu ajumirya ebibbote abaswasa
era abahatonda bosibosi bahubbira Musengwa amafuha.
8 O Musengwa, abaatu bomu Sayuuni basangaala
nʼabomu bibuga bya Yuda basaŋalya olwʼohuŋulira emisango eji olamula.
9 O Musengwa, ndiiwe Ali Ŋamugulu Obugali era oŋuga ehyalo hyosihyosi,
ohirira ŋale abahatonda bosibosi.
10 Enywe omwenda Musengwa, mucaawe ehibi.
Ahuuma abaatu babe era gabanunula ohuŋwa mu maani gʼababi.
11 Enjase yaduhira abahola ebiruŋamu
nʼesangaalo liba nʼabemyoyo emigwalaafu.
12 Enywe abagwalaafu mwesimwesi musangaale olwʼebyo ebi Musengwa ahola.
Mumweyaase olwʼowawufu wuwe.